Chanchin thar thenkhat te :

Tunkar-ah thlawhna beisei

Air India chuan tunkar Thawhlehni atang hian Lengpui-ah thlawhna a service tir tan beisei a ni. Principal Consultant Aviation J. Lalhming-liana sawi danin Air India in ruahmanna a siam angin tunkar Thawhlehni atang hi chuan Kolkata-Lengpui-Imphal chu thlawh tan tir an beisei tih a sawi a. “Air India lam atangin an thulh thu kan la dawng lo a, chuvangin lokal turah kan ngai a, kan beisei phawt a ni,” a ti. Ruahman dan chuan kar khatah ni 3, Thawhlehni, Nilaini leh Ningani ah te thlawkin Kolkata atangin Lengpui-ah lo tumin Imphal a pan ang a, heta tang hian Kolkata ah a let leh thin dawn a ni.

Tun dinhmunah Air India bak Airline dang Service an la awm hrih dawn lo a, Guwahati lam chu engtikah nge a service ang hriat a la ni hrih lo. Kolkata-Aizawl thlawhna service hi ruahmanna hmasa ah chuan May ni 26 atanga neih tan tum a ni a, mahse cyclone in West Bengal a nuai avanga Kolkata Airport pawh thuam that a ngaih avangin ruahmanna hmasa angin thlawh tir theih a ni lo a ni.

Oil zawnna kawng khar sak

Oil India ten Mizoram-a tuialhthei an zawn mekna, Phulmawi-ah State dang atanga hnathawktu an lo kal belh leh avangin Phulmawi VLTF ten hnathawkte khunghran nan an awmna pawhtu kawngpui an khar sak. Phulmawi VLTF ten leiverh hna kalpui mek a hnathawktu ni 20 dan vela an inthlak reng chu him lo a an hriat avangin hnathawh chhunzawm rihlo turin Oil India te hi an lo ti tawh a, Oil India te chuan hna an chawlhsan hlana Gas leh thildang a lo put chhuah loh nan uluk taka chhin phui that a ngaih avangin hetiang lam mithiam bik an rawn kal a ngaih thu sawiin, Duliajan, Assam atangin mi 7 an rawn thleng leh a, heng mite hi ni 14 chhung khunghran an tul avangin hemi chhung atan hian an kawng hi an pin sak ta a ni.

IAS tan Post thar 3 siam

Mizoram sawrkar chuan Mizoram-ah IAS tan Post pathum (3) siam tharin an awmna a sik-sawi nghal a, Lawngtlai DC, Shasanka Ali-i chu Labour, Employment, Skill Development & Entrepreneurship Department (LEDSE)-ah Addl. Secretary tura sawn a ni a, Siaha DC nilai Bhupesh Chaudhary chu Cooperation Department-ah Addl. Secretary tura sawn niin Champhai DC atanga SAD-a OSD-a sawn tak, Naveen SL chu Transport Department-ah Addl. Secretary tura sawn a ni bawk. IAS sawn zingah Aizawl-a Addl. DC, Kumar Abhishek chu Siaha DC tura sawn niin School Education Department Director, K. Lalrinzuali chu Higher & Technical Education-ah Director hna chelh tura sawn a ni bawk. School Education Director hna hi Addl. Director, James Lalrinchhana chuan a chelh lai-lawk rih dawn a ni.

Damlo te rawn haw

Mizoram mi Cancer vei damlo leh anmahni awmpuitu State pawn-a awm mi 156-te chuan Inrinni khan an pual bika thlawhna rawih hmangin Lengpui an rawn thleng. Civil Aviation-a Principal Consultant, Wing Commander J. Lalhming-liana sawi danin Cancer vei leh anmahni awmpuitu, Mumbai leh Kolkata khawpui amite hi thlawhna tumhmun khar vek a nih avangin March ni 25 atang khan an tangkhang tawh a, an rawn haw theih nan hian sawrkar chuan hma lak puiin an Thlawhna hman tur hi a ngaihtuah sak a, a hman man erawh anmahni thawhkhawm niin tun tuma rawn haw te hi puitling 154 leh nausen 2 an ni.

Bungtlang South-ah In 4 chhia

Zirtawpni tlai-a thli leh ruah thawkin Lawng-tlai District chhung Bungtlang South khua-ah chenna In 4 a tichhia a, heng te hi Zinglallawma, Zingsangliana, Lalchhanchhuaha leh Lalthan-sanga te In niin heng In chhia thawmthat hna hi Inrinni khan khawtlang huap-a neih a ni a, mi 300 chuang thawkchhuakin sawrkar atanga tan-puina awm thei ngaihtuah sak an ni bawk.

Building sak mek tlawh

Law & Judicial Minister, TJ. Lalnuntluanga chuan Inrinni khan Siaha-a District Court building leh Judicial Quarters (Grade-I) sak mek te chu a hmunah a tlawh a, hei bakah hian Siaha-a District Transport Office sak mek pawh a hmunah a tlawh nghal bawk. Heng hna viltu PWD hotute chuan an dinhmun tlangpui lo hrilhin Judicial Quarters leh DTO Office chu hun reilote ah sak zawh a nih tur thu an lo hrilh bawk. Minister hian Tipa Block huamchhunga VLTF Duty te a tlawh a ni.

Minister in mipuite chah

Nimin May 31, 2020 kha 'World No Tobacco Day' a ni a, kumin hian 'Vaihlo siam-chhuaktu ten zuk leh hmuam ngawlvei tura thalaite an hruai sual tur venhim' tih chu thupui-ah hman a ni. He Ni puala thuchah a siamah Health Minister, Dr. R. Lalthangliana chuan COVID-19 leng avangin vaihlo leh a kaihhnawih lei tur a van thu leh a hma aia a to thu sawiin, hei hi remchang ah laa nghei phah nana hmang turin mipuite chu a chah bawk.

Zirtirtute ruat an ni

Lunglei District Bawrhsap, V. Lalsangliana chuan Lunglei-a Kohhran hmunhma hrang hrang 20-a Community Quarantine Centre-a a tula anga puihbawm hna thawktu turin Zirtirtu mi 35 leh Sawrkar Department dang atangin mi 10 te chua  ruat.