Chanchin thar thenkhat :

Positive 5 hmuh belh leh

Mizoram-ah COVID-19 kai hmuhchhuah belh zel niin nizan hmasa khan hri kai mi 5 hmuh-chhuah belh leh an ni a, heti hian Mizoram-ah COVID-19 kai enkawllai mi 21 an awm mek a ni. Nizan hmasa a COVID-19 kai hmuhchhuah thar zinga mi 4 te hi COVID-19 vei ni a rinhlelh, ZMC-a admit tawh sa an ni a, pakhat hi Lunglei Quarantine Centre a awm mek a ni thung a, mipa 3 leh hmeichhia 2, kum 22 leh 29 inkar vek niin Khawsik leh khuh nei mi 4 leh symptom nei lo mi pakhat an ni a, Delhi atanga lo haw 4 leh Gujarat atanga lo haw mi pakhat niin May ni 28 leh June ni 1 inkara lo haw an ni a. Lunglei Quarantine Centre-a hmuhchhuah thar hi Eklavya Residential School Quarantine Facility a awm lai niin asymptomatic a ni a, Covid Care Centre, Pukpui-ah dah luh nghal a ni. Heti hian Mizoram-ah tun thlengin COVID-19 kai hmuhchhuah mi 22 awm tawhin heng zinga mi pakhat chu enkawl dam a ni tawh a, mi 21 chu enkawl mek niin nunna chan erawh an awm lo thung.

I&PR Minister in tlangzarh
Information & Public Relations Minister, Lalruatkima chuan nimin khan a Pisa-ah C. Zama lehkhabu ziak, 'Zalenna sualtute East Pakistan-ah' tih chu a tlangzarh a. He hunah hian I&PR Minister chuan he lehkhabu kaltlang hian thang-tharte hnenah hnam pasalthate inpekna leh zahawmna, thu dik tak hrilhfiahin awm se a duh thu a sawi bawk. He lehkhabu hi C. Zama lehkhabu ziah 28-na a ni a, zalenna sual tan tirha hnam sipaite East Pakistan (tuna Bangladesh ni ta) an kal a, an chenchilh chhung chanchin, East Pakistan an chhuahsan leh tak dan thleng tarlan a ni a, Mizo-ram Publication Board-in an chhuah sak a ni.

Central YMA in ngenna siam
Central YMA chuan thuchhuah siamin in-kharkhip kalpui mekah Mitthi vuinaah Social Distancing uluk taka kalpuia hmaituamna hmang uar tura chahin, mipui a tlem thei ang ber kal thin nise tiin thuchhuah a siam.

MP thlanna chuh tum zel
Mizoram in Rajya Sabha MP Seat khat a neih hnawhkhahna tura tun thla ni 19-a inthlanna neih turah Mizoram Pradesh Congress Committee (MPCC) chuan P.C. Zoram Sangliana, PAC Member chu an party Official Candidate tur a nih thu nimin khan an puang a. Zoram Peoples Movement (ZPM) pawhin Official candidate atan B. Lalchhanzova, Dawrpui Veng Aizawl chu an ruat thu nimin khan an puang bawk a, amah hi ZPM Gen. Hqrs. ah  General Secretary i/c Frontal etc nilai a ni. Hemi hmalam hian MNF Party chuan an Candidate tur chu K. Vanlalvena a nih thu an lo puang tawh bawk a ni.

MSU in mipuite an ngen
MSU General Hqrs. chuan inkharkhip vanga zirna In ten Monthly Fee zaa 50 aia tam la lo tura inremna an siam chu zawmlo an awm nia sawiin, hetiang lo hria te chuan Fee pekna Slip nen June 8, 2020 hmain Ph. 8014146640/9612579380 leh 9402145541-ah te hriattir turin an ngen.

Comments

Chhiar Hlawhte