Chanchin thar thenkhat :

Khawl lei nan nuai 21 pe

Nimin khan Hauva & Sons, Zawlbuk Tuizem neitu ni bawk, Thantluanga, Kanan Veng Aizawl chuan COVID-19 Swab Test nana Real Time Polymerase Chain Reaction (RT- PCR) khawl leina tur cheng nuai 21 chu Health Minister, Dr. R. Lalthangliana hnenah a hlan. He sum hlanna puala nimin chawhnu-a Health Minister Office-a neih ah Minister chuan hun khirh tak karah midangte tana malsawmna ni tura mimal an rawn penchhuak chu lawmawm a tih thu sawiin, a let tam takin Pathian in malsawm se a duh thu a sawi a. Health Secretary pawhin thu sawiin Health Minister hmalakna in ICMR atangin RT-PCR khawl neih belh a nih dawn bakah National Health Mission-a sum dawn atangin ni 10 vel chhungin RT-PCR neih belh a nih tur thu a sawi bawk.

Governor in hlawh pe dawn

Mizoram Governor P.S. Sreedharan Pillai chuan COVID-19 hripui leng do nan a hlawh pumpui atanga 30% chu May thla atang hian thla 6 chhung Chief Minister’s Relief Fund-ah a chhung-lut dawn a. Governor thla khat hlawh hi Rs 3,50,000/- niin thla tina CM’s Relief Fund a Governor-in a chhunluh tur hi Rs 1,05,000/- a ni a, hei hi thla 6 hnuah ennawn a ni leh dawn a ni. CM’s Relief Fund-ah a thla hlawh 30% a chhunluh bakah Mizoram Sawrkarin inren-chemna kalpui mekna zulzuiin Governor chuan Raj Bhavan enkawlna senso pawh tihhniam turin ruahmanna hrang hrang a siam nghal bawk.

MYC in Survey nei dawn

COVID-19 avanga Mizo thalai phai lama hnathawk tam tak te chu an hnathawh lai chhun-zawm thei lovin Mizoram-ah an lo haw khawm a. Mizoram Youth Commission chuan heng mite kawng engemaw ti a tanpui dan a awm theih nan an data lakhawm turin survey a nei dawn a, Survey form hi link forms.gle/gPYZcKpntpcCCWvm8 ah fill up tur a ni a. Survey Form te hi June 15, 2020 hma ngeia thehluh tur niin hemi atana lo pui turin District tin DC te chu MYC chuan a ngen bawk.

Rel-a chesual boral

Inkharkhip kalpui avanga Pune atanga Mizo-ram pana rawn haw, Marlia Vanlalhmangaihzuali chu nizan hmasa dar 11:00 vel khan Samsi Railway Station, Siliguri bulah Rel atanga chesualin a boral. Pune Mizo Welfare Association hruaitute sawi danin Marlia Vanlalhmangaihzuali (26), Keifang khua, Shivneri , Pune-a awm mek hi nizan hmasa dar 11:00 vel khan Samsi Railway Station, Siliguri thlen hma deuhah chesualin Rel atangin a tla a, a chetsual thu hi hriat a nih veleh Emergency brake pawt-a zawn nghal a ni a, nikhaw hre lova hmuh niin enkawl nghal mah se zan dar 12:35 vel khan a boral zui ta a ni. Marlia-i rawn haw pui mi 5 te chuan a ruang hi buaipui zui nghalin a ruang hawpui dan tur hi Railway in an buaipui dawn a ni.

Ration Card thlunzawm ngai

Mizoram sawrkar-a FCS&CA Department chuan thuchhuah siamin Central Sawrkar in India khua leh tui dik tak, Ration Card nei ten ramchhung khawi hmunah pawn an Ration quota an lak theihna tur, 'National Portability of NFSA Card Holders under One Nation One Card' hmang ve tur a Mizoram Sawrkar nasa taka a rawn nawr tak avangin he scheme ti hlawh-tling tur chuan Ration Card-a Aadhaar la link lo emaw, an Aadhar Card-a an hming leh Ration Card-a an hming in millo ten Ration Quota an la thei dawn lo tih an sawi a. Hei vang hian Ration Card leh Aadhar card la thlunzawm lo leh Ration Card leh Aadhar Card-a hming chuang inmillo te chu siamtha thuai turin an hriattir bawk.