EMRS Society thutkhawm nei

Mizoram-a Eklavya Model Residential School (EMRS) Society Meeting hmasa ber chu nimin khan Social Welfare Department changtu Minister leh he Society-a Chairman ni bawk, Dr. K. Beichhua hovin neih a ni.
EMRS Society Meeting hi SAD Conference Hall, Aizawl-ah neih niin EMRS kalphung te, zirna kawnga Tribal naupangte an hnufual bik loh nan Ministry of Tribal Affairs, Govt. of India bultuma kalpui a nih dan te leh Mizoram a EMRS kalpui dan te inhrilhhriat a ni. EMRS din nan hian khawtlang-in 20 acres a zau ram an pek (donate) a ngai a. Tlang ram-ah EMRS pakhat sak nan cheng vbc. 24 zel Ministry of Tribal Affairs hian a ruahman thin a. EMRS-ah hian naupangte hi a thlawnin zirtirna pek an nih bakah, uniform, lehkhabu leh an mamawh chi hrang hrang te a thlawn veka pek an ni a. Residential School a nih angin naupangte Hostel-ah awm vekin, an ei leh in pawh a thlawn veka pek an ni a, Central Board of School Education (CBSE) zirtirna leh a Board hi an zawm vek a ni.
Mizoram-ah hian EMRS hi Serchhip leh Lunglei-ah te kalpui mek niin Academic Session tharah Ngopa, Lawngtlai leh Chawngte-ah te hawn tum a ni a, Tuipang, Tlangnuam, Bilkhawthlir, ZawInuam, Tlungvel leh Niawhtlang (Siaha)-ah te sak mek a ni bawk.

Comments

Chhiar Hlawhte