Latest News

MZP hruaitu ten Jampui tlangdung-a Tuikuk dah tum chungchang CM hnenah an thlen

MZP General Hqrs. hruaitute chuan nimin khan Chief Minister, Zoramthanga chu a Pisa-ah kawmin Tripura sawrkarin Mizote chenna, Jampui tlangdunga Tuikuk dah an tum chungchang leh thil pawimawh hrang hrang an sawipui.
MZP General Hqrs. hruaitu ten nimin-a Chief Minister an kawmna ah hian MZP hruaitute chuan Tripura Mizote chenna, Jampui leh a chhehvelah Tuikuk raltlante dah tura ruahmanna siam a ni mek chu pawi an tih thu sawiin, hemi chungchangah hian a rang lama hmala turin Chief Minister chu an ngen a. Chief Minister chuan Jampui tlangdunga Mizote himna turin theihtawp an chhuah mek tih sawiin, “Kan unaute tibuai zawnga hmalakna awm lo turin Tripura Sawrkar thuneitute kan hrilh tawh a, Inremna thuthlung anga kal zel anih theih nan hmalak zel a ni ang,” a ti a. Tunhnaia Mizo IR duty kutthlaktu tun thlenga man an la nih loh chungchangah Chief Minister chuan misualte man turin hma an lak mek thu a lo hrilh bawk a ni.
COVID-19 duty ten tangkai zawka an hman tur Ambulance leh RT-PCR lei belh thuai a nih theih nan leh a donate duh ten awlsam zawka an donate theih nana ruahmanna siam turin MZP hruaitute chuan Chief Minister an ngen bawk a. Chief Minister chuan sawrkar sum dinhmun thlir chung zela ruahmanna siam a nih tur thu MZP hruaitute hi alo hrilh a. MZP chuan hrileng vanga Mizo zirlai leh khualzin, Myanmar ramchhunga tangkhang mekte chu hrileng karah Inter-State a mite hruaihaw an nih angin hruai haw ve dan tur ruahmanna siam tura ngen bawkin, Chief Minister chuan khualzin tang mek zathum (300) chuang te chu Union Home Ministry lamah pawh thlen tawh a nih thu leh an lo pawm ngei theihna turin chak taka hmalak mek zel a nih thu a sawi bawk.
MZP hruaitute chuan tun thla ni 30-a lo thleng tur, ‘Remna Ni’ chu hman leh ngei an tum thu leh an inpuahchah mek dan leh lungrual taka hman ho theih dan turte an thlen a. Chief Minister chuan Mizo mipuite tan remna hlut zia leh pawimawhna kan hriat a ngai tih sawiin, “Mi tam tak nunna chan leh tha leh zung sengtute vanga State ralmuang leh nuam kan ni thei hi a hlu hle,” tiin MZP ten Remna Ni pawimawhna leh hlutna hria a kumtin an hmang chu lawmawm a tih thu leh a tul anga inrawn tawn zel nise tiin MZP hruaitute chu a chah bawk.

Comments

Popular News (Last 30 Days)