A nupui emaw tiin na takin nula kuttthlak

Nizan hmasa dar 7:30 vel khan Khawzawl-ah pa pakhatin a nupui emaw tiin Tualpui khaw nula pakhat chu Chempui Bil lamin a sat a, he nula hi Champhai Hospital-ah enkawl mek a ni.

Khawzawl SP, Lalchung-lura sawi danin vanduaina tawk nula hi Lalhlimmawii niin niminpiah khan Tualpui atangin Khawzawl-ah chhukin Zuchhip Veng-ah a innghat a, zanriah eikham hnu dar 7:30 velah Dulte pan tuma chhuakin thil theih-nghilh a neih avanga a let leh chu Laldawngliana (36), Khawzawl Dinthar chuan lo tidingin Chempui hriam lo lamin a hmai-ah a sat a, a bulhnaia kawng-a kal ten lo hmuin Khawzawl damdawi In ah hruai a ni a, a hmai ah hliam nasa tak tuarin thui ngai te thui sak a nih hnuah Champhai Damdawi In-a enkawl zui turin phurchhoh leh a ni.

Hetianga pawi a khawih hnu hian Laldawngliana hi tlanbo nghalin Khawzawl Police te chuan zan dar 8:00 velah Report an dawng a, he thil thleng hi Police te chuan a zan la la-a chhui nghalin thu zawhfiah turin mi pahnih lak nghal an ni a, nizan hmasa zanlai vel khan Laldawngliana hi an man ta a ni. Laldawngliana hi niminpiah chhun khan a nupui, Lalhlimmawii innghahna, Engmawia fanu nen inti thiam lovin a nupui hian a chhuahsan a. A nupui hi a pa te In-ah a kal ringin nizan hmasa khan alo chang a, Lalhlimmawii chu a nupui emaw tiin a sat ta mai niin a sawi a ni. Laldawngliana hi Khawzawl Police Station-ah thubuai siam sak nghal a ni a, nimin vek khan Court-a inlan turin Champhai-ah lak nghal a ni bawk.

Tualpui khua chuan he thil thleng chungchangah hian nimin khan thuchhuah siam nghalin he thil thleng hi an hriatthiam loh thu leh pawi an tih thu sawiin, he pawi khawihtu in an khaw nula kut a thlak chhan dik tak zawnchhuah an phut thu leh pawi khawihtu hi a phu tawk hremna pek an duh thu an sawi a, Lalhlimmawii inenkawlna senso zawng zawng pawh hi pawikhawihtu hian a pek ngei an phut thu leh tun hnuah hetiang thil hi thleng tawh lo se an duh tih an sawi bawk. Hemi hmalam hian Tualpui khawtlang hruaitute leh Khawzawl Joint VC, Joint YMA leh Group YMA hruaitute chuan inkawmna neiin pawikhawihtu in a phu tawk hremna a hmuh ngei theihnan theihtawp chhuahin hmalakho nise an ti bawk.