AMC Ward-V chhunga Veng 3 hnenah Property Return atangin Ambulance sem

Aizawl Municipal Corporation (AMC) Ward No. V Councillor, Rosiamngheta chuan a bial chhunga Veng pathum ten an hman tur Ambulance pathum nimin khan a hlan.

AMC Ward No. V huamchhunga Veng pathum- Chanmari, Zarkawt leh Electric Veng ten an hman tur heng Ambulance hlanna inkhawm hi nimin khan GIG Motors, Edenthar-ah neih a ni a, he hunah hian MPCC President leh Chief Minister hlui, Lal Thanhawla chuan heng Motor Chabi te hi a dawngtu turte hnenah hian a hlan a, MPCC President chuan COVID-19 do chungchangah sawrkar puihbawm a ngai hle tih sawiin, “He hrileng chungchangah hian sawrkar hi dem tum tan chuan demna tur a tam ang. Mahse, kan la tawn ngai loh thil a nih avangin inbuatsaih thiam a har a, engemawchen kan hriatthiam a ngai,” a ti a. Politics chu ringtute tan chuan rawngbawlna a nih thu sawiin, “Pu Rosiamngheta hian mipui tan a ngaihtuahna a hmang nasa hle a, kawng tam takin a luangchhuak thin. COVID-19 chungchangah pawh hian sawrkar Official ni si lo ah chuan Pu Rosiamngheta aia luangchhuak nasa an awm kher lo mai thei. Mimal pawhin hetiang taka veng hrang hranga Ambulance a pek theih chuan AMC-ah Congress kan sawrkar leh a nih chuan Veng tinah ambulance kan pe vek thei ang,” a ti bawk.

He hunah hian Rosiamngheta chuan Ambulance chu vengchhung ten hlawkna atan hmang lo tur leh hloh si lo, hlawhna atana hmang si lo-a kal tur a beisei thu sawiin, pawn lam hire-na rate aia 50% a hniam tur leh, mi retheiten a zar an zo theih nan BPL-te chu a thlawna phur zel tura a duh thu a sawi a. “Mizoram-ah Ambulance indaihlohna a nasa hle a, mi 65,000 in Ambulance pakhat kan intawm mek avangin khawi hmunah pawh Ambulance mamawhna hi a sang hle a. Chuvangin, Property Tax Return kum 2 chhung khawl khawmin ka bial chhunga Veng pathumte tan Ambulance kan lei ta a ni,” tiin “Mi in Tax a pek chuan a return a hmu thin,” a ti a. “Politics hi eizawnna a ni lo a, mahni inchhek arbawmna tur a ni hek lo. Mahni mihring puite tan, mipuite tana rawngbawlna a ni. Mihring ropuina hi sum leh pai-a teh lovin, a mihring puite hnena a pekchhuahah teh zawk tur a ni,” a ti bawk.

Aizawl Electric Veng, Chanmari Veng leh Zarkawt khawtlang hruaitute hian an Ambulance tur theuhte hi an khalh haw nghal a, Ambulance hi Eeco Van niin, damlo mutna tur khum bakah Oxygen bur dah sa vek a ni bawk a, Ambulance pakhat atan hian cheng nuai 6 chuang theuh sen a ni.