Tunhnaiah Thli leh Rial avanga chhiatna thlengah chenna In chhe zawng zawng 795 a tling

Tunhnaia Thli leh rial thawk khan Mizoram District 9-a khaw 58 ah chenna In 795 a tichhia a. Heng zinga In 46 te chu thawmthat ngaihna awm lova chhe vek niin a bak In 749 te chu thawmthat theih a ni thung.
Disaster Management & Rehabilitation Department changtu Home Minister, Lalchamliana chuan tunhnaia Thli, Rial leh ruah avanga chhiatna thleng chungchangah nimin khan thu sawiin, Mizoram-a District 11 zingah District 9 in chhiatna hi tuarin, khaw 58-a chenna In 795 a chhiat thu leh heng zinga 46 te chu thawmthat ngaihna awm lova chhe vek a nih thu a sawi a, a bak In 749 te chu thawmthat theih a nih thu a sawi.
Chhiatna tuartute hi anmahni District-a Deputy Commissioner, District Disaster Management Authority (DDMA) Chairman ni bawk kaihhruaina hnuaiah tanpuina awm thei ang ang te chu pek tuma hmalak mek zel anih thu Minister chuan sawiin, Saitual District-a Hliappui khua In a tuar nasa bik tih a sawi a, Rial in chenna In 268 a tichhia a, chung zinga 189 te chu Inchung chhe vek, a thar thlak ngai leh a bak chenna In 79 te chu a chung a then chhia te an nih thu a sawi bawk.
DM&R Minister chuan Hliappui-a Inchung thawmthat nan Rangva bundle 890 sen a nih thu pawh sawiin, Aizawl atangin chhungkaw thenkhat in mahni chhung chhiat tawk te tan rangva bundle 52 an thawn chho bawk tih a sawi a, Hliappui a chenna In siamthat nan tha 4033 sen a nih thu leh heng zinga tha 1887 te chu khualkhua a mi niin a bak tha 2146 te chu tualchhung a mi an nih thu a sawi bawk.

Comments

Chhiar Hlawhte