Hmarchhak State hrang hrang 4 atangin Mizoram mi leh sa hruai haw hna thawh tan a ni

Rampumah inkharkhipna kalpui a nih tak avanga hmarchhak State pali - Assam, Manipur, Tripura leh Meghalaya-a Mizoram mi leh sa tangkhangte hruai haw hna chu nimin khan thawh tan a ni a, hruai haw hna hi naktuk thleng thawh tura ruahman niin Serchhip District-ah pawh mi 17 hruai haw tura ruahman a ni.

COVID-19 leng avanga rampum-a Lockdown kalpui a nih hnua India hmarchhak State hrang hranga tangkhang te hruaihaw an nih tur thu Chief Minister, Zoramthanga’n a lo puan tawh angin nimin khan Mizoram mi leh sa tangkhang hruai haw hna hi thawh tan a ni a, heng mite hruai haw tur hian Aizawl atanga Bus tirh a nih bakah State thenkhat ah chuan Motor awmsa te hmanga Mizoram rawn pan a ni bawk a. State pali - Assam, Meghalaya, Manipur leh Tripura atanga hruai haw tura beisei te hi a tirah Chief Minister chuan Assam-ah mi 154, Manipur-ah mi 318, Meghalaya-ah mi 201 leh Tripura-ah mi 20, an vaiin mi 693 an nih thu sawi mah se thudawnna thar berah chuan Aizawl District-ah mi 311, Lunglei District-ah mi 32, Champhai District-ah mi 39, Lawngtlai District-ah mi 49, Siaha District-ah mi 31, Kolasib District-ah mi 73, Serchhip District-ah mi 17, Mamit District-ah mi 20, Saitual District-ah mi 60, Hnahthial District-ah mi 12 leh Khawzawl District chhungah mi 12, an vaiin mi 656 an ni dawn ta zawk a. Thudawn danin, State pali atanga Mizorama rawn haw tur a tam zawk chuan Mizoram an rawn pan mek a, nizan zanlai-ah khan Mizoram rawn thleng hman tura beisei an ni.
Tun tuma heng State hrang hrang atanga hruai haw tur zingah hian Serchhip District-ah mi 16 hruai haw tura ruahman ni tawh mah se Report thar berah mi 17 hruai haw an ni zawk dawn nia thudawn a ni a, Meghalaya State atanga hruai haw tur tam berin mi 11 hruai haw an ni dawn a, midang 5 te chu Assam atanga hruai haw tur niin Tripura atanga hruai haw tur mi pakhat a awm bawk a, heng mi hruai haw te hi Eklavya Model Residential School, Kawlri tlang-ah ni 14 chhung khunghran tura ruahman an ni.
Ruahman lawk ang chuan heng State hrang hranga tangkhang Mizorama hruai haw te hi ramri-ah uluk takin COVID-19 hri an kai leh kai loh Rapid Test Kit hmanga endik vek an ni dawn a, hri kai an lo awm palh a nih chuan COVID-19 hri kai enkawlna hmun damdawi In-ah dah nghal tur an ni dawn a, hri kailo te chu ni 14 chhung Quarantine Centre hrang hrang ah khung hran an ni dawn a. Ni 14 hnua an chhuah dawnah an hriselna enfiah leh vek an ni ang a, an Negative chuan an In-ah Home Quarantine phal sak an ni ang.

Comments

Chhiar Hlawhte