Kolasib District tlawh chhunzawm

Rural Development Minister, Lalruatkima leh Serlui bialtu MLA, Lalrinsanga Ralte te chuan nimin khan Kolasib District chhung fang chhunzawm lehin Vairengte-a COVID-19 Screening Point, North Chhimluang, Bilkhawthlir, Phaisen, Buhchangphai, Bukvannei, Saihapui 'K' leh Rengte-kawn te an tlawh.

Heng hmun hrang hrang an tlawhna ah hian RD Minister chuan Zoram himna atana dai theua, hah taka duty-te inpekna a hmun ah a hmuh duh hrim hrim avanga kal a nih thu sawiin, “In inpekna a ropui ka ti tak zet a ni,” a ti a. Ram leh hnam humhalh tak tak tur chuan ramri tih hmasawn a ngai tih sawiin, chumi lam hawia ke pen an tum thu a sawi bawk.

Rural Development Minister chuan thlai chi thlak hunlai a nih avanga theihtawpa hma la tura mipuite chu fuihin, he hun harsa an tawh mek hi malsawmna ah chantir tum turin a sawm a. “Ei leh bara intodelh tura harh tharna kan chan hun, malsawmna hun, intodelhna tura tih tak zeta kan beih tanna hunah i hmang ang u. Thlai chi thlak uar ila, thlawhhma leh leipui siam uarin intodelhna hunah i hmang ang u,” a ti bawk.

Minister hian Vairengte Task Force kutah Rs. 20,000/-, Golgotha Centre leh Hope Centre-ah Rs. 10,000/- ve ve Task Force an tlawh te kutah sumfai a hlan a. Serlui bialtu MLA pawhin Vairengte-a ramri ven nan Drone a hlan bawk.