Tun hi fimkhur tul hun lai ber a ni - Health Minister

Health Minister, Dr. R. Lalthangliana chuan COVID-19 laka invenna kawnga hmalakna leh inpuahchahna enfiah turin nimin khan Lunglei District leh Hnahthial District-te a tlawh.
Nimin a heng District a tlawhna ah hian Health Minister chuan Mizoram mi leh sa tangkhangte mi sing chuang hmun hrang hrang atanga an rawn haw belh zel dawn avangin inthlahdah lovin mitin te kan fimkhur zual sauh a tul takzet tih sawiin, Mizoram-ah COVID-19 a darh loh nan tun hi fimkhur tul hun lai ber a ni, a ti.
Mizoram-a kan Healthcare Infrastructure chungchang te pawh sawiin Health Minister chuan tun dinhmunah ZMC-ah ICU khum pasarih (7) chauh a awm a, COVID-19 hri a darh vaih chuan a ram pumin kan buai hle dawn a ni, a ti a. Mizoram in Healthcare Facilities kan neih that tawkloh avangin invenna lamah theihtawp kan chhuah chhunzawm zel a tul thu sawiin, tunah hian Mizoram-ah positive case kan nei rihlova a lan avang hian kan thla a muang sual ang tih a hlauhawm a, kan fimkhur loh chuan sawrkar leh NGO-te, Local/Village Level Task Force bakah mipuiten hah tak leh rim taka hun engemaw chen kan lo beih ve tang tangna hi zan khat thil thu ah kan tichhe vek thei tih hria a sawrkarin tih tur leh tih loh tur a tih te tha taka zawm tlat turin mipuite a chah nawn leh a ni.
Health & Family Welfare Minister hian Chennai khawpuiah Mizo kum 29 mi COVID-19 kai hmuhchhuah thar anih thu pawh sawi langin, he patient hi a dinhmun a that thu leh COVID-19 vei enkawlna Hospital-ah admit niin enkawlna tha tak a dawn mek thu a sawi bawk.
Nimin a heng District pahnih a tlawhna ah hian Minister hi District thuneitu ten lo dawng-sawngin Official ten he natna chungchanga an hmalakna hrang hrangte an lo hrilh bawk a ni.

Comments

Chhiar Hlawhte