Lockdown kalpui tur sawiho

Mizoram-ah inkharkhipna kalpui mek chu a thawh li-na atan kalpui leh tura ruahmanna siam a nih hnuah Lockdown 4.0 hi May ni 18, 2020 atanga May ni 31, 2020 thlenga neih a ni dawn a, nimin khan Mizoram Chief Secretary, Lalnunmawia Chuaungo hovin Lockdown 4.0 atana inkaihhruai dan tur bakah thil pawimawh dang chi hrang hrang an sawiho a ni.

Secretariat Conference Hall, Aizawl-a he sawihona hunah hian thil pawimawh chi hrang hrang an sawi zingah PMGKY hnuaia Insurance in a cover zingah Frontline a thawk, COVID-19 natna veite direct contact nilo te insurance in a huam ve theih dan tur ngaihtuah nise tih a ni a, Police, VLTF/LLTF leh Volunteers te bakah Hospital leh Quarantine Centre hrang hranga bawlhhlawh lakhawmtute leh paihtute bakah a phurtute pawh tel tir dan ruahman nise an ti a, heng bakah hian sawrkarin hnathawk tura a chhawr ten an hnathawhna hmuna an duty laia COVID-19 an lo kai palh a nih a insurance cover tir dan tur ruahman tha an ti bawk a, hemi lo bawhzui tur hian Task Group on Insurance chu ruat an ni.

Rapid Antibody Test chungchang pawh he hunah hian sawilan niin tangkhang Mizoram a lo haw te chu hmun hla tak tak atanga lo haw an nih avangin Screening Point-ah rei tak tak RAT nei tura innghahtir loh dan ruahman nise an ti a, tangkhang lo haw tur hi an pun belh zel dawna a lan avangin Screening Point a Medical Duty dah belh a tul a hriat a ni bawk. RAT hi a tira tih bak chu COVID-19 symptoms an neilo a nih chuan tih nawn ngailo tura ngaih a ni a, hei bakah Quarantine Facility atanga Home Quarantine tura chhuah phalsakte chu an chhuah hmain RAT tih a tul tih sawilan a ni bawk.

Hei bakah hian tangkhang lo haw te chu Quarantine Facility a lut lova Home Quarantine an duh nghal a nih chuan Screening Point-a RAT Non-Reactive an nih a ngaih bakah, DC leh an chenna Local/Village Level Task Force te remtihna an lak a ngai thung a ni.