The Mizoram (Containment and Prevention of COVID-19) Ordinance, 2020 hman tan nghal a ni

Mizoram sawrkar Council of Ministers thukhawmin a pawm tak, The Mizoram (Containment and Prevention of COVID-19) Ordinance, 2020 chu Governor in a pawmpui hnuin hman nghal a ni a. COVID-19 dona atana Dan hman lailawk bawhchhiate hremna tur leh pawisa chawitir theitu turte tarlan a ni.
COVID-19 hrileng dona atana Dan siam lailawk (Ordinance) bawhchhiate pawisa chawitir theitu tura ruatte chu : Executive Magistrate tu pawh; Sawrkarin dan kengkawh tura a ruat Law Enforcing Officer tu pawh; Police Officer tu pawh, Constable aia hniam lo; State Level, District Level, Village leh Local Level Task Force on COVID-19 Chairman, Vice Chairman leh Member Secretary te an ni.
The Mizoram (Containment and Prevention of Covid-19) Ordinance, 2020 in ‘Public Place’ tih te chu mipui punkhawmna hmun hrang hrang - Hospital leh Health Centre zawng zawng, Amusement Centres, Parks, Playgrounds, Hotels and Restaurants, Public Offices, Work Places, Educational Institutions, Libraries, Public Transport Vehicles leh an dinna Stands leh Stations, Railway Station, Airport, Public Road, Stadium, Auditorium, Community Hall leh Centres, Commercial Establishments, Gyms, Market place area, Shopping Malls, Wholesale dawr leh Retail Shops, Petrol pumps, Religious Institutions te bakah mipuiten an tlawh nasat hmun dangte a ni.
The Mizoram (Containment and Prevention of COVID-19) Ordinance, 2020 bawhchhiatna leh hrem theihna te chu :-
1. Public place a Mask vuah lova lut leh leh Mask vuah lova awm chu Rs. 100/- chawitir theih a ni.
2. Public place a Social Distancing Protocal zawm lo chu Rs. 200 chawitir theih a ni.
3. Public place a chil chhak chu Rs. 300 chawitir theih a ni.
4. Phalna nei lova mipui kalkhawmna emaw, Sakhaw thila punkhawmna huaihawt chu Rs. 5000 chawitir theih a ni.
5. Phalna nei lova ramri pela kal emaw, phalna nei lova Mizoram chhunga lo lut chu Rs. 5000 chawitir theih a ni.
6. Quarantine pumpelh tum emaw, quarantine facility a Isolation dah tur pumpelh tum chu Rs. 3000 chawitir theih a ni. 
7. Quarantine Facility emaw, Isolation Facility a awm chen tur awm tluan lova chhuak emaw, tlanbo emaw chu Rs. 1000 aia tlem lo emaw, Rs. 5000 thleng chawitir theih a ni.
8. Quarantine Facility a awm laia dan zawmlo leh midangte himna tiderthawng chu Rs. 500 chawitir theih a ni.
9. Central sawrkar emaw, State sawrkarin COVID-19 do nana dan leh inkaihhruaina a duante zawm duh lo leh, State sawrkar lockdown inkaihhruaina zawm duh lo chu Rs. 1000 chawitir theih a ni.
10. Phalna nei lova COVID-19 vei damlo leh COVID-19 vei nia rinhlelh nihna leh thlalak Print Media, Electronic Media, Social Media-a pholang chu thla thum (3) thleng lungin tantir emaw, Rs. 5000 thleng chawitir emaw, a pahniha hrem theih a ni ang.
Mi tu pawh a pawisa chawi tur pe duhlo chu, a chawi tur a pek hma chu man a nihna hmunah hren theih a ni anga, darkar 24 chhunga a la pe duh lo a nih chuan thla 4 (li) thleng lung In tantir theih a ni ang.
Pawisa chawitirtu chuan record fel tak vawngin, pawisa leh record chu a awmna DC Office-ah a thehlut ang a, DC chuan Treasury ah a deposit ve leh dawn a ni.

Comments

Chhiar Hlawhte