COVID-19 vei te dinhmun Minister in sawifiah

Health Minister, Dr. R. Lalthangliana chuan nimin khan a Pisa-ah Kolkata a Mizo zinga COVID-19 natna kai, Cancer vanga inenkawl mek nizan hmasaa boral a awm thu sawiin, hmun hrang hranga COVID-19 natna vei Mizote dinhmun a sawifiah.

Health Minister chuan Kolkata AMRI Hospital-a Mizo Cancer vei inenkawl mek zinga pathumin tunhnai khan COVID-19 an vei tih hmuhchhuah a ni tih sawiin, COVID-19 natna kai thar zinga pahnih hi mipa niin an zinga pakhat zawk, Vairengte khua ami chu vanduaithlak takin nizan hmasa khan a boral a ni, a ti. Health Minister chuan COVID-19 natna avanga boral ta chu sawrkar laipuiin inkaih-hruaina dan a siam zawm a ngaih avangin Mizoram-ah rawn haw pui theih a ni lova, hetihlai hian Vairengte-a a chenna In-ah amah thlahna hun nimin khan siam niin a ruang hi Mizo in vui dana thlah liam a nih theih nan kawng hrang hrangin hma lak a nih thu leh nizan khan vuiliam tur a nih thu a sawi bawk.

Health Minister chuan Mumbai Mizoram House-a COVID-19 positive pariat hmuhchhuah zingah pahnih positive an la awm thu pawh sawiin, Mizo Cancer vei inenkawl mek pakhat leh hnamdang Mizoram House a thawkte an ni tih a sawi a. Tunah hian an zinga pali chu dam fel tawh a puan niin a dang pahnih pawh hi test negative tawh sa an ni a, a tihchian nan test leh niin result nghah mek a ni, a ti bawk.

Zoram Medical College a COVID-19 positive kan neih mek pawh a dinhmun a that chhoh zel thu sawiin, a negative a ni tihchianna tura Sample chu Silchar Medical College-ah thawn a nih thu leh reilote ah result hriat beisei a nih thu a sawi a. Shillong-a COVID-19 vanga boral ta Dr. John Sailo chenpui a chhungte zinga COVID-19 natna vei te pawh an negative vek tawh thu a sawi bawk.