Tamil Nadu leh Puducherry-a Mizoram mi leh sa tangkhang 884 te Mizoram rawn thlenpui an ni

Rampum-a inkharkhip kalpui a nih avanga Mizoram mi leh sa ramchhung hmun hrang hranga tangkhang te hruaihaw mek niin Tamil Nadu leh Puducherry atanga rawn haw te chuan nimin khan Bairabi Rail Station an lo thleng a, heng mite hi Mamit DC, Dr. H. Lalthlangliana hovin Medical Team, Liason Officers leh Police ten venhimna tha tak hnuaiah an lo dawngsawng a ni.
Nimin a Mizoram rawn thleng te hi an vai hian mi 884 an ni a, Aizawl District mi 346, Lunglei District 50, Champhai District mi 69, Serchhip District mi 34, Kolasib District mi 44, Siaha District mi 136, Lawngtlai District mi 46, Mamit District mi 82, Saitual District mi 37, Khawzawl District mi 20 leh Hnahthial District mi 20 an ni a. Heng mite hi Rel atanga an lo chhuk rual hian uluk takin Medical Team ten Screening an lo kalpui a, an chuanna tur Bus-ah luhtir nghal niin, Bairabi Rel Station hi khaw chhung lut lovin, by-pass kawng atangin an chhuahsan a ni.
Nimin-a Bairabi Rel Station lo thleng ten anmahni District theuh an panna tur hian Bus 53 ruahman a ni a, heng te hi Aizawl District tan 21, Champhai tan Bus 5, Hnahthial District tan Bus 1, Khawzawl tan Bus 1, Kolasib District tan Bus 3, Lawngtlai District tan Bus 3, Lunglei District tan Bus 3, Mamit District tan Bus 5, Saitual District tan Bus 2, Serchhip District tan Bus 2 leh Saiha District tan Bus 7 niiin he thu buatsaih lai hian Hot Zone atanga lo haw mi 54 te zing 31 chu Rapid Antibody Test tih niin an la Negative vek a. Rawn haw te hi an awmna District hlat dan a zirin Screening tih niin Bus pawh chhuahtir an ni. Siaha Bus chhuak hmasa berin Kolasib District chuanna Bus chu a chhuak hnuhnung ber a. Bairabi khaw pawn, Meidum thlen hmaah ei leh in inpekna tur hmun uluk tak a siam sak an ni bawk.
Tun tuma Tamil Nadu leh Puducherry atanga rawn hruai haw zinga Serchhip District-a haw tur mi 34 te lo dawngsawng tur hian Serchhip District pawh he thu buatsaih lai hian a inpeih fel tawh a, Disaster Management & Rehabilitation Department-a Serchhip District Organiser, Vanlalduhi Ralte chuan tun tuma mi 34 rawn haw turte hi nizan dar 11:00 khan anmahni dahna tura ruahman, Eklavya Model Residential School, Kawlri tlang rawn thleng tura beisei an nih thu leh helai hmunah hian an thlen veleh a mamawh tur engkim lo ruahman a nih thu a sawi a, ei leh in tur pawh lo buatsaih a nih thu leh an mutna tur hmun pawh inhlat taka ruahman fel a nih tawh thu a sawi bawk. DM&R-a District Organiser chuan tuna rawn haw te khunghranna tur hmun, EMRS-ah hian midang pawh thahnem tak dah theih ala ni dawn tih sawiin, heng hruai haw te avang hian mipuite tan lo chi-ai na tur a awmloh thu a sawi bawk.

Comments

Chhiar Hlawhte