Agriculture Development Board Team-II ten Serchhip District an rawn tlawh

Mizoram sawrkar hnuaia Agriculture Development Board Team-II te chuan nimin khan Serchhip rawn tlawhin Mizoram Flagship Programme, Socio Economic Development Programme (SEDP) chungchang leh hmalakna tur inhrilhhriatna neih a ni a, hemi hnu hian Serchhip Zawlpui phai pawh tlawh nghal a ni bawk.

Agriculture Development Board Team-II te hian an Leader leh Agriculture Development Board-a Vice Chairman ni bawk, H. Biakzauva MLA hova Serchhip hi rawn tlawhin Serchhip DC Meeting Hall-ah District mi pawimawhte nena inkawmhona an neih bakah, Media mite nena titi hona an nei a. He hunah hian Team Leader, H. Biakzauva chuan hripui vangin khawvelin harsatna a tawk a, ei leh bar dinhmun a tlahniam duai duai a, he hun harsa ah hian Mizoramin kan mamawh ei tur tam zawk kan tharchhuah theih nana intichak tawna, loneitute harsatna te hriat sak tuma thawkchhuak an nih thu a sawi a. Mizoram in kum khatah buh 60,000 Metric Ton vel kan thar mek tih sawiin, kan kum khat mamawh erawh 1,80,000 MT vel a ni thung a, kan mamawh hmun thuma thena hmun khat vel chauh kan thar tihna a ni a. Hetiang hi kan dinhmun nih avang hian India ei bar harsatna lo thleng thei laka kan inven nan Lo leh huan siam thei apiangten kan siam a tul a, tunah Lo vah theih a nih tawh loh avangin Chul rih leh Kanghreng thlenga uar a ngai a ni, a ti. Hei bakah hian thlai chi lamah pawh intodelh tura tan lak thar a tul thu sawiin, loneitute hamthatna hrang hrang, a bikin PM-KISAN leh Farmer Pension Scheme te chu nasa zawka hmang turin mipuite a ngen bawk.

Serchhip District Bawrhsap, Dr. Lalzirmawia Chhangte kaihhruai he hunah hian Board member dang, Commissioner Lalkiamlova leh Zion Lalremruata te pawhin thu an sawi a, Mizoten buh chu chaw ber-a kan neih a nih anga buh thar tam tura leilet leh thingtlang lamah pawh tan lak a tul thute, buh chu a pawisaa chhutin a man to lo mahse nitin chaw a nih vanga a hlutna a san thute sawiin, Mizoram chu tunhmaah chuan mahni ei khawp buh tharchhuak thin, chuvanga Mautam tam, Thing tam leh tampuimitthi vawi tam tak lo paltlang tawh kan nih dan te ngaihthlak a ni.

He hunah hian Serchhip District Agriculture Officer, C. Lalnithanga chuan Serchhip dinhmun tlangpui report a pe a, tun dinhmunah WRC Farmer chhungkaw 1960 ten leilet 3710 Ha a zau an siam mek thu sawiin, Hactares 2352 bik hi buh chinna a nih thu a sawi a, leilet siam theihna ram awl 1357 Ha zeta zau District chhungah a la awm thute a sawi a. Kumin hian Lo atana ram theh 5431 Ha a nih thu leh chung Lo-ah te chuan SEDP leh FOCUS hmalakna te a Vaimim, Behliang leh thlai dangte chin an nih tur thu a tarlang a ni.

Heng bakah hian Thlai chi nasa taka sem chhuah mek a nih thu te, Leilet neitute hnenah Chinai thi pek vek an nih tur thute a tarlan bakah tuikawng siam that ngai engemawzat a awm thu te a tarlang bawk a. Serchhip DHO, M. Vanlal-zami pawhin kumin atana thlai chi an inbuat-saihna a sawifiah bawk.

He inkawmna kaihruaitu District Bawrh-sap, Dr. Lalzirmawia Chhangte IAS chuan, ei leh bara nasa zawka tharchhuah kan neih theih nana hmalakna kal mek leh chumi kal zela Agriculture Development Board Team ten Serchhip an rawn tlawh chu lawmawm a tih thu a sawi a. Heng hmalakna te hian rah duhawm tak a chhuah ngei a beisei thu a sawi bawk.

Nimin a he hun hmanna ah hian loneitu aiawh leh tlawmngai pawl aiawhte pawhin an harsatna leh tha nia an hriat te an sawi ve bawk a, inkawmhona neih zawh hian Media mite nena inkawmhona hun tawite buatsaih zui a ni a, chumi zawhah he Team Member te hian Zawlpui leh a chhehvela thlai chinna hmun hrang hrang te tlawhin, hmalakna atana pawimawh te an thlir nghal bawk a ni.