State dang atanga haw te vangin fimkhur zel tul ti

Mizoram Doctor-te chuan State dang atanga Mizote an lo haw mek avangin hri leng lakah fimkhur a ngai reng tih an sawi a. Health facility a that tawk loh avangin inven chu hmanraw tha ber nia an ngaih thu leh COVID-19 chu a darh palh a nih chuan kan tawrhna a nasa turah an ngaih thu an sawi bawk.
IMA Mizoram Branch Pre-sident leh COVID-19 Operational Team-a tel, Dr. Rosangluaia chuan mithiam (Epidemiologist)-te chuan he natna hi kan ramah a darh zel a nih chuan mihring cheng nuai 12 velah 30% (360,000)-in kaiin, natna kai zinga 80% (mihring 288,000)-te chu lang chhuak lemlo tura ngaih a nih thu leh damdawi In pan pawh ngai lem lo turte an ni tih a sawi a. Damdawi In-a dahluh ngai tur hi 20% (mi 72,000) vel niin, 5% (mi 18,000) chuan ICU mamawh ngei tura ngaih an nih thu leh 3% (mi 10,800) chuan ventilator an mamawh tura ngaih a nih thu a sawi.
IMA President chuan Mizoram hian Ventilator 110 a neih mek thu leh heng zinga 60/70 bawr hi chu damlo enkawlna atana hman reng a ni tih sawiin, Mizoram damdawi In-ah hian khum 8000 awm anga chhut a nih thu a sawi a. “100% kan him hi a tih ngam lo a, Mizo lo haw mek an awm zela a, palh awm thei a ni a, enkawltute pawhin an kai palh thei a. Kan Health Facilty hi a len loh avangin hri leng invenna kan ti tha lo a nih chuan Epidemiologist-te’n an chhutna ang ‘epidemic’ hi thleng thei a ni a, chumi thlen loh hram hi kan tum tur a ni a, a nih loh chuan kan tawrhna a nasa viau ang,” a ti.
Natna vei lang chhuak si lo/lang chhuak tlem tê chu a thehdarhtu ber nia ngaih an ni tih pawh sawiin, “Taksa chak tha, thalai lam an ni duh a, hei vang hian Mask vuah hi a pawimawh a. Mask vuah thatna ram apiangah he natna hi a darh chak lo a, 60%-in a punna hi a hniam niin an sawi a. Pawn chhuak leh dawr nghaktu pawh hian mask hi vuah zel a tha,” a ti bawk.

Comments

Chhiar Hlawhte