Chanchin thar thenkhat :

Kawngpui blacktop dawn

Saitual atanga Saichal inkar kawng chu cheng vbc. 31.844 sengin black top hna thawh a ni dawn a, hemi atana E-tender pawh Zirtawpni khan tihchhuah a ni. Hemi chungchang hi Inrinni khan Lengteng bialtu MLA, L.Thangmawia chuan thu-thar thehdarhtute hnenah sawiin, Saitual-Saichal kawng hi kum 2006 khan laih zawh a niin black top a ni lo tih a sawi a, he kawng hi blactop zawh anih chuan Manipur State bakah Mizoram chhunga khaw 20 chuangin an chhawr tangkai thei dawn niin a sawi bawk. Saitual-Saichal Road hi Mani-pur lam kalna kawng anih bakah Lengteng bial khaw tam zawk leh Hnahlan tlangdung kalna niin tuna kawng pangngai (Kawlkulh kaltlang) aiin KM 34 velin a tawi zawk a. Kawngpui enkawl hna hi National Highway & Infrastructure Development Corporation Ltd. (NHIDCL) in an thawk anga, thla ruk (6) chhunga zawh tura ruahman a ni bawk.

PPE Volunteer Group in hma la
PPE Volunteer Group, Mizoram chuan CO-VID-19 hripui dona lockdown Mizoram sawrkar in a puana, hripui do tura hma a lak tantirh phat atangin Mizoram chhunga puanthui thiam intel-khawm District hrang hranga awmte chuan hripui dona atana mamawh Personal Protective Equipment (PPE) chu mahni inpe in an thui ve nghal tih an sawi a. PPE Volunteer Group hnuaia Mizo-ram District hmun hrang hranga mi inpe hi mi 446 niin thawmhnaw leh bungrua tlawmngaia semchhuak tura mi inpe te nen chuan mi 476 vel an nih thu pawh sawiin, tun thlengin PPE Suit 1430, Masks 21,890, Face shield 44, Cap 186, Scrub 583, Soap 100, Gloves 250, Hand Sanitizer litre 5, Disinfectant litre 15 leh Shoe Cover 30 an thui chhuak tawh tih an sawi bawk.
PPE Volunteer Group, Mizoram hian Disaster Management & Rehabilitation Department atangin PPE leh bungraw dang lakkhawmna atan Rs. 3,60,000/- an dawn thu leh hei hi khua/Veng 13-ah an semchhuah thu an sawi bawk.

Damlo enkawl dam pung zel
India ramah COVID-19 kai hmuhchhuah mi 40,070 awm tawhin enkawl dam mi 10,886 an awm a, nunna chan mi 1306 awmin enkawllai mi 28,070 an awm bawk. COVID-19 kai hmuh-chhuah atanga chhutin enkawl dam hi 27.16% an ni tawh a, nunna chan 3.25% niin enkawl lai hi 70.05% an ni a, za zela chhutin enkawl dam hi an pung ve zel a ni.

BJP in hmalakna thlirho
BJP Mizoram-a OB leh Section Head te chuan Inrinni khan Aizawl-a an Office-ah Mizoram chhunga COVID-19 do nana hmalakna an thlirho a. Local Task Force ten mipui ei bar harsat loh nan leh mipui himna tura an hnathawh te chu fakawm an tih thu sawiin, Health Workers leh Frontline Duty te inpekna vangin Mizo te India ramah fak kan hlawh nasa hle niin an sawi.

MLA Fund tihtawp rih duh
PRISM Party chuan kumin 2020-21 a MLA LAD Fund  cheng vbc. 60 chu kumin atan titawp rih turin sawrkar an ngen. Inrinni-a thuchhuah an siamah PRISM Party chuan hrileng vanga ni 40 zet mipuiin inkharkhip vanga harsatna kan tawh mekte phuhruk turin sawrkarin kum 2020-21 atana MLALAD cheng vbc. 60 a dah chu kumin atana titawp turin an ngen a. SEDP Board enkawlna (management) atan nikum-ah sum dahlo chunga Supplimentary Demand hmanga nuai 222 zet a hmanral si avangin kumin budget-ah SEDP Board atan hian sum dah nilo mah se, Board hi thiah a nih loh avangin sum nuai za tel a ral leh ngei dawn nia sawiin, Sawrkar hnenah sum renchemna atan hmun dang a mi pawt peng lo turin an ngen nghal bawk.

BMP dincham vawi 40-na
Vawiin May 4, 2020 hi Baptist Kohhran a Mipa pawl, Baptist Mipa Pawl (BMP) din-champha vawi 40-na a ni a, kumin hian he Ni hman dan tur hi ruahmanna erawh siam a ni lo thung. BMP hi May 4, 1980 khan Thingsai-ah ‘Baptist Men’s Fellowship’ tia din niin kum 1983 khan a hming hi thlak a ni a, tunah hian member 15,100 an awm mek a ni.

Comments

Chhiar Hlawhte