Mizoram-a Sawrkar Pisa kai dan tur leh mipui vantlang khuahkhirhna siam thar a ni

Vawiin atanga India rampuma Lockdown thawh thumna kalpui a nih dawn avangin Mizoram sawrkar chuan Sawrkar Pisa kai dan tur leh mipui vantlang tana khuahkhirhna leh hriat tur a siam thar.

Hemi chungchang a sawrkar thuchhuah in a tarlan danin Sawrkar Pisa zingah Health Services, Police, Home Guards, Civil Defence, Fire & Emergency Services, Disaster Management, Civil Aviation, Prisons, Excise & Narcotics, Municipal Services, Forest Field Works, PHE leh P&E Department-a Technical Staff te chu a pangngaiin (full strength in) an kal anga. Sawrkar Office dang - Secretariat, Directorate, District Administration leh Field Office dang te hawn an ni anga. Group A leh B Officer te chu dan pangngaiin Office kal vek tur a ni a. Group C leh D Staff te erawh chu hmun thuma thena hmun khat zelin an in kalchhawk anga. Secretary, Head of Department emaw, Head of Office ten inkalchhawk dan tur an ruahman anga, a tul dan azirin Group C leh D Staff te hmun thuma then a hmun khat aia tam pawh kal turin an ruahman thei ang.

Office chhungah phalna la hmasa lovin pawnlam mi kal phal a ni lova, hemi atan hian Phone in emaw an hmuh duh te phalna lak hmasak phawt tur niin tul bikah lo chuan Meeting neih loh tur a ni a. A huhova inrawn/sawiho ngai thil a awm anih chuan a theih chin chinah Video Conferencing leh Online Mode dangte hman tangkai hram tur a ni a. Meeting turin District-a Officer te Aizawl ah koh loh tur a ni bawk.

Tun thla ni 17 thlenga Lockdown kalpui chhung hian mi 5 (panga) aia tam punkhawm khap niin tul bik thilah lo chuan tumahin mahni In leh compound an chhuahsan tur a ni lova. Tlai dar 7:00 leh zing dar 4:00 inkarah pawnchhuah khap tlat niin hemi atan hian Deputy Commissioner ten Section 144 CrPC tlawhchhanin inkhuahkhirhna thupek an chhuah ang a. Hei hian COVID-19 chungchanga Duty te leh Deputy Commissioner-in phalna a pek te a huam lovang.

Hei bakah hian loh theihloh thil anih loh chuan kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te chu mahni inchhungah inkharkhip tur a ni a. Pawn chhuak tur leh damdawi In-a kal tur reng reng chuan (face mask emaw hmanraw dang hmangin) hmai an tuam ngei tur niin vantlang hmun leh dawr-a kal te chu feet ruk tala inhlata awm tur a ni a. Ramri dep khuaa cheng ten ram pawn lam mi mikhual an nei thianglo bawk. Hetihlai hian hmasawn nana hmalakna leh mimal eizawnna chu phalna hranpa lak ngai lovin kalpui theih a ni tawh a. Amaherawhchu, ram chhunga awmsa labour te chauh ruaia thawh tur niin hnathawktu ten ‘SOP on Social Distancing’ zawm chungin hna hi thawh tur a ni.