State Bamboo Mission kalpui dan chhui zui zel tum

ZPM Thalaite chuan Mizoram Sawrkar-in State Bamboo Mission a kalpui dan leh sum hman a nih dan te chu an chhui zui zel dawn tih sawiin, Mizoram sawrkar in cheng nuai 792 a dawn chu a hman dan an zawt bawk.

Nimin a thuchhuah an siamah ZPM Thalaite chuan nikum May 3 khan Harit Kumar Shakya, Under Secretary (NRM), Department of Agriculture, Cooperation & Farmers Welfare, Ministry of Agriculture & Farmers Welfare chuan State tina State Mission Director, State Bamboo Mission hnenah kum 2019-2020 chhunga Central Sawrkar Scheme 'National Bamboo Mission' kalpuina atan Central Sawr-kar-in sum a pawmpui zat hriattirna a tihchhuah thu leh he Scheme hnuaiah hian Mau/Rua hmun siamna turte, Mau process-na tur siamna leh Bamboo Industry chawisanna turin Mizoram dawn tur pawh cheng nuai 792 lai a ni thu leh, State sawrkar in a sum dawn tur atangin zaa sawm a tum ve a ngai tih tarlan a ni bawk tih an tarlang a.

ZPM Thalaite chuan kum 2019-2020 chhunga hnathawh nan National Bamboo Mission kaltlangin Mizoram State Bamboo Mission in sum a dawn tawh zat leh chumi atanga sum sen leh an hmanna te sawrkar chu zawtin, kumin March thla tir-a Hmunpui ram-a Model Bamboo Plantation-a raw ching turte, Lengpui khaw mi 126 leh Hmunpui khaw mi 100-te Lo vahna tur Rs. 10,000 leh mang khawhna tur Rs. 2,500 theuh Sawrkar-in a pek chu State Bamboo Mission atanga pek nge, SEDP atanga pek tih sawichiang turin sawrkar chu an phut bawk.

Hei bakah hian ZPM Thalaite chuan Mizoram Sawrkar-in State Bamboo Mission a kalpui dan chu National Bamboo Mission-in thil tum (Objectives) paruk a neih zinga a hmasa ber, ‘Mau/Rua plantation hi ram ngaw tichhe lova mimal leh sawrkar rama siam tur a ni,’ tih chu zawm a ni em tih leh sum hman a nih dan te chu an chhui zui zel dawn tih an sawi bawk.