Inkharkhip chhunga a pangngai-a School Fee lak tum te hnenah Fee la pe rihlo turin MZP in an ngen

MZP General Hqrs. chuan School Fee chungchangah hma an la zel tih sawiin, School Fee pangngai anga lâk tum School-a zirlai nu leh pa te chu School Fee la pe rihlo turin an ngen.

MZP General Hqrs. hian nimin khan Extended OB Meeting neiin inkharkhipna avanga School Fee chungchanga harsatna tâwk zirlaite chungchang an sawiho a. Inkharkhipna kalpui a nih avanga zirlaiten School Fee chungchanga harsatna an tawh mek chungchangah Education Minister, MZP leh Mizoram Independent School Association (MISA) ten 50% aia sang la lo tura an ngenna hrethiam duh lova School Fee a pangngai anga lâk tuma thuchhuah siam School tlem azawng an la awm talh chu pawi an tih thu sawiin, School Fee pangngai anga lâk tum School-ah hian zirlai nu leh pa te chu School Fee la pe rihlo tur leh MZP hmalakna ngaichang turin Zirlai nu leh pate a ngen a. Zirlaite harsatna hrethiam duhlo School fee lak chhunzawm tum an awm zel a nih chuan MZP chuan a tul angin hma a la zui zel dawn tih sawiin, MZP hmalakna lo ngaichang zel turin zirlai nu leh pa te pawh an hriattir a. Hetih rual hian an ngenna ngai pawimawh a Private School tam zawkin zirlaite Fee chungchangah hun harsa leh khirh tak kan hmachhawn laia zirlai nu leh pa te dinhmun hrethiam a,  ngaihnathiamna an nei ta chu lawmawm an tih thu an sawi bawk.

MZP chuan Inkharkhipna kalpui a nih mek avanga School engemaw zatin Online Teaching hmangin zirlaite zirtirna an pek mek thu pawh sawiin, School hrang hrang thuneituten zirlaite ngaihthah lova online teaching kalpui nachang an hria chu lawmawm an tih thu an sawi a. Hemi kawngah hian zirlaiten tha zawka Online teaching an dawn theih nan Information & Communication Technologies (ICT) Department-in Online Teaching kalpuina tura pawimawh tak internet signal chak leh tha lehzual nei tura hma a lâknaah an lawm rualin, zirlaiten tangkai taka internet kaltlanga zirlai an kalpuina hi tha lehzuala a kal zel theih nan leh Thingtlang kilkhawr thlenga Internet Signal tha zawk a awm theih nan chak zawka hmala turin ICT enkawltu, thuneitute an ngen a. Mizo thalaiten Information Technology-ah nasa zawka hma kan sawn theihna turin ICT Department chu tun aia thuamchak aniha hma a sawn theih nana hmala turin sawrkar chu an ngen bawk.