Chanchin thar thenkhat

Hlawh pek turah tihluihna a awm dawnlo tih sawi

Chief Secretary, Lalnunmawia Chuaungo chuan Mizoram Sawrkar hnathawk te hlawh thla riat (8) chhung zaa 10 COVID-19 donan an pek tur chu tihluihna nilovin Voluntary Donation a nih thu a sawi. Chief Secretary chuan sawrkarin hnathawkte hlawh tihluihna a laksak a tumlo tih sawiin, Sawrkar hnathawk thenkhat hah tak tak an awm laiin, a tam zawk chu In-ah an awm a, Full Salary an dawng tho tih sawiin, mi thahnemngai ten Task Force te pawh an pui thin tih a sawi a. Task Force te hmalakna fakin, mi inpe tam tak awm karah sawrkar hnathawkte pawhin tanpuina pek ve tha an tih tlan avanga an hlawh hi pe an nih thu a sawi bawk.

Hetihlai hian Mizoram-a sawrkar hna-thawk inzawmkhawmna pawl, Federation of Mizoram Government Employees & Workers (FMGE&W) hruaitute chu nimin khan thukhawmin sawrkar hnathawk te hlawh COVID-19 dona atana thawh tura thutlukna awm chu ennawn sak turin Chief Secretary hnenah ngenna thlen nise an ti bawk.

Health Minister in kawm

Health Minister, Dr. R. Lalthangliana chuan nimin khan Zoram Medical College (ZMC) tlawhin Mizoram in COVID-19 hri vei a neih enkawltu ZMC-a thawk Head of Department te, Doctor leh Staffs-te nen inkawmna an nei a. Health Minister chuan damo enkawltute chu an hlawh-tlinna ah lawmthu hrilhin, “Tun dinhmunah chuan Mizoram in COVID-19 positive kan nei ta lo a, naktuk-ah enge thleng dawn tih chu sawi theilo mah ila, in thawhrimna te, inhuaisenna leh inpekna avangin in chungah Health Department changtu Minister ka nih angin lawmthu ka sawi,” a ti a. Tun ang reng renga Medical College kan tawng-taipuina ang hi a la awm ngai lo tih pawh sawiin, “A tawpkhawk chu Pathian vang a ni,” a ti bawk. 

Central YMA in ngenna siam

Central YMA-a Central Executive Committee (CEC) chu nimin khan Aizawl-ah thu-khawmin COVID-19 dona kawnga Sub-Hqrs./Group/Branch YMA hrang hrangte hmalakna ah lawmthu sawiin, he hripui hi ziaawm lam aia a nasa chho zel nia a lan avangin hripui dona kawngah chak zawka hmala turin an ngen a. Hripui ven kawngah khauh zawk leh an huam-chhung ngun lehzuala vil tura chahin,  hmundang atanga lo haw sawrkar thupeka khunghran turte khunghran an nih ngei theih nan te pawha hma la turin an chah bawk.

Tuichang lui-a tlahlum

Nimin chhun dar 12:30 vel khan Malsawm-kimi (30) D/o LH. Lianzuali, Electric Veng Hnah-thial chu Tuichang lui-ah chesualin tui-ah a tlahlum a, nimin tlai khan vuiliam nghal a ni. Thudawn danin Malsawmkimi hi a nau pakhat leh a thian pahnih te nen Tui cheng turin Tuichang-ah hian an kal a, tunhma-a 'Tarpho kai' an tih ah chesualin a tlahlum ta a ni. Helai hmun hi tunhma lama lir-thei kaina ni mah se lung lakna leh tiau lakna atana hman a nih avangin luikuang a danglam nasain chhinchhiahna a awm bawk si loh avangin a chesual phah nia ngaih a ni.

CLP Leader in duty tlawh

Congress Legislature Party Leader, Zodintluanga leh Lalrindika Ralte MLA bakah Congress hruaitu thenkhat te chuan nimin khan Assam leh Tripura ramri- Darlak, Tuidam, Tuipanglui, New Eden, Kawrthah, Rengdil, Zamuang, Zawl-nuam, Bungthuam, Luimawi leh Kanhmun khuaa COVID-19 avanga ramri veng-a rammu a duty Village Level Task Force leh YMA duty hrang hrangte tlawhin pawisafai leh Solap Lamp eng-emaw zat an sem nghal bawk.

COVID-19 kai pung chho zel

India ramah COVID-19 kai mi sing nga an tling tawh a, nimin tlai thleng khan he hri kai hmuh-chhuah hi mi 52,952 an tling tawh a ni. India rama he hri kai hmuhchhuah an pun zel lai hian enkawl dam pawh pung ve zelin mi 15,266 te chu enkawl dam an ni tawh a, hei hi hri kai atanga chhutin zaa 28.82 an tling a, he hri vanga nunna chan mi 1783 awm tawhin tunah hian enkawl lai mi 35,902 an awm mek bawk a, nitin he hri kai hi an la pung chho zel rih niin a lang.