Serchhip MZP in HSLC Pass thar an lawmpui

MZP Hqrs. Serchhip chuan MBSE in kum 2019-2020 HSLC result a tihchhuah tak a Serchhip khaw chhunga zirlai hlawhtlinna chang zawng zawngte thinlung taka an lawmpui thu an sawi.
Nimin-a thuchhuah an siamah MZP Hqrs. Serchhip chuan MBSE in kum 2019-2020 HSLC result a tihchhuah taka Serchhip khaw chhunga zirlai hlawhtlinna chang zawng zawngte thinlung taka an lawmpui thu leh an kal leh zelna turah pawh duhsakna sang ber an hlan thu tarlangin, an thiamna leh finna te ti pung zel a, ram leh hnam, khawtlang tana tangkai taka hmang turin duhsakna sang ber an hlan tih an sawi a. Zirlai vanduai ta, hlawhtlinna chang zo ve ta lo te pawh an tawrh-pui thu tarlangin, beidawng mai lova theihtawp chhuah a he an vanduaina hi malsawmna a an chantir theih ngei nan ngawrh leh zual a zira hlawhtlinna chang ngei tawh turin duhsakna an hlan bawk.
MZP Hqrs. Serchhip chuan HSLC exam result chhuak ta a Mizoram pum a Top ten (10th position) a lang phak leh Mizoram-a Mathematics subject a Topper ni bawk, Lalrempuii d/o Lalrammawia, Marian High School, Serchhip chu an chhuangin a lawmpui tak meuh meuh tih pawh sawiin, Govt. JM High School, Serchhip te 100% passed result an neih theih avanga thinlung taka an lawmpui thu an tarlang a. Naupang te tana theihtawp chhuahtu Zirtirtute pawh an chhuangin zahna chibai bukin, zirlai nu leh pa, fate zirna atana theihtawp chhuah tute an chhuangin, thinlung taka an lawmpui thu an tarlang bawk.

Comments

Chhiar Hlawhte