Sawrkar hnathawkte sum thawh chungchang Association-te leh mimal kutah dah a ni

COVID-19 kaihhnawiha sawrkar hnathawk te sum thawh chungchang sawihona chu nimin khan Chief Secretary, Lalnunmawia Chuaungo hova neih leh niin sawrkar hnathawk te sum thawh chungchang chu Association te leh mimal kut-ah dah a ni.

Tun thla ni 5-a Chief Secretary hova Mizoram Sawrkar hnuaia sawrkar hnathawkte intelkhawmna Association hrang hrang 75 ten Mizoram Sawrkar hnuaia Group A, B leh C ten an hlawh (basic pay) atangin 10% leh Group D ten an hlawh (basic pay) atangin 5% chu kumin December thla thleng thawh (contribute) an remtih hnuah sawizui neuh neuh a awm avangin nimin khan Chief Secretary, Lalnunmawia Chuaungo kaihhruaiin Mizoram Sawrkar hnuaia Association hrang hrang 87 aiawhten ATI Conference Hall, Aizawl-ah COVID-19 kaihhnawiha sawrkar hnathawkte sum thawh tur chungchang hi a tum hnihna atan an rel leh a. He hunah hian Association hrang hrang aiawh kalkhawm atangin mi 43-in thu an sawi a ni.

He hunah hian duhdan leh rawtna hrang hrang engemaw zat chhawpchhuah niin zau taka sawihona hun hman a nih hnuah sawrkar hnathawkte sum thawh tur chungchang chu Service Association theuh te leh mimal kutah dah nise, tiin thu tihtluk a ni a. Chief Secretary chuan Service Association ang a ni emaw, mimal ang pawha COVID-19 dona atan leh hripui leng mekin a nghawng Mizoram sum leh pai dinhmun siamthatna tura mahni duh thu ngeia sum thawh duhte tan sawrkar a inhawng reng a ni, a ti.

Chief Secretary chuan COVID-19 donaa a hmatawnga tang Health Deparment, Police, mipui nitin mamawh ngaituahtu Supply Department leh a kaihhnawih department dangte, Sanitation Workers te, bawlhhlawh paih motor khalhtute, District Administration-a thawk te, mipuiin kan hmuhloh leh hriat phak loha lockdown lai pawha nasa taka thawktu sawrkar hnathawkte hnenah lawmthu a sawi a. COVID-19 dona atana sum thawh chungchangah pawh sawrkar hnathawkten CM Relief Fund-ah te, Local leh Village Level Task Force ah te, thenawm khawveng harsa tanpuina kawngah te sum tam tak an thawh tawh tih sawiin, tlawmngai pawl, kohhran, sawrkar hnathawk leh mipuite tanrualna avangin tun thlengin Mizoram chu COVID-19 lakah kan la him a ni, a ti bawk.