Latest News

Chanchin thar thenkhat :

Tlawng lui humhalh sawiho

Nimin khan Aizawl District Bawrhsap, Vanlalngaihsaka hovin a Pisa-ah Aizawl khawpui chawmtu tui lakna ber, Tlawng Lui tih bawlh-hlawh chungchangah thutkhawm pawimawh neih a ni a. Tlawng lui hnar-a Reiek kawngdung hmun thenkhatah leivung leh bawlhhlawh paih nasa lutuk avangin Aizawl khawpui chawmtu tui lakna a tihbawlhhlawh nasa hle a, hei hian harsatna namen lo thlenin, PHE Department tui tihfimna pawh hun engemaw chen a ti khaihlak nghe nghe a. Hei vang hian he thutkhawm hi neih niin AMC in leivung leh bawlhhlawh dang paihna hmun atana a lo ruahman tawhte chu a huhovin en nise, Dan bawhchhiaa a hmun lova leivung leh bawlhhlawh paihte chu an permit cancel thlenga hmalak rel a ni.

National Technology Day
Directorate of Science & Technology buat-saihin nimin khan Aizawl-a an Conference Hall-ah 'National Technology Day 2020' hman a ni a, he hun hi Planning Secretary, Dr. C. Vanlal-ramsanga chuan hmanpuiin Science & Technology pawimawhzia leh he lama hma kan sawn zel a tulzia te a sawi bawk. National Technology Day hi May ni 11, 1998-a Rajasthan-a Pokhran thlalera India in Nuclear enchhinna hlawhtling taka a neih hriatrengna leh Science leh Technology lam mite infuihtharna ni atan India ram pumpuiah hman thin a ni.

Economic Dev. Comtt. din
COVID-19 hripui leng mek avanga tampui lo thleng thei laka lo inpuahchah lawkna leh ei leh bar tharchhuah kawnga intodelh leh a hralhna lam thlenga ngaihtuaha hmala tur, Champhai District Economic Development Committee chu din a ni a. He Committee-ah hian Champhai South bialtu MLA leh Law Minister, TJ. Lalnuntluang chu Chairman niin Co-Chairman-ah Champhai DC leh Member Secretary-ah District Agriculture Officer te ruat an ni a, Adviser leh Member turte pawh ruat nghal an ni bawk.

SDC-FSCC hmalakna sawiho
Social Welfare Minister, Dr. K. Beichhua hovin nimin khan Siaha Circuit House-ah Mara Autonomous District Council-a MDC te leh Siaha District COVID-19 Food Security Consultative Committee te chuan inkawmna an nei a. He hunah hian SSDC-FSCC in inkharkhip avanga Siaha District mipui te ei leh bar-a harsatna an tawh lohna tura hmalakna tur an ruahman te sawiho a ni. He huna tel MDC 28 te chuan SDC-FSCC hmalakna atan hian an hlawh atangin Rs. 10,000/- theuh an thawh a, MLA 2 te pawhin an hlawh atangin Rs.20,000/- ve ve an thawh bawk.

Champhai-ah ruihhlo halral
Nikum August thla atanga November thla chhunga Champhai Police ten Heroin an man Hawng 107 (Gram 1366.09) chu nimin khan Champhai DC, Mark Lalthanliana chuan Cham-phai District Hospital-a thil halralna hmun, Incinerator-ah a halral a, heng ruihhlo hi a vaiin Rs. 52,24,000/- hu niin thubuai 9 kaihhnawih ami a ni. Heng ruihhlo halralna hunah hian Champhai DC chuan heng ruihhlo thahnem tak an halral chuan thalai, ruihhlo bawih-a tang mekte nun pahnih khat tal a chhanhim a beisei thu a sawi bawk.

PRISM in Mizoram-ah Vai inkhuar an awm niin sawi
PRISM Party chuan COVID-19 darh zêl tùr vênga ramri-a kan duty ngawrh hle lâi hian hmarchhak lam-a Assam leh Mizoram inrina atanga Mizoram lam KM 2 vêl, Aizâwl District chhûnga Mauchar ram chhûng, Tairangnek lui in Tuirial a finna-ah vâi Mâu sât lûtin an inkhuar mek tih an sawi a, heng mite hian Sai an kawl avangin Civil mite tan chuan hmalak a harsat thu leh sawrkar in hma a lak a tul thu an sawi bawk.

Comments

Popular News (Last 30 Days)