Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

Prime Minister hovin Video Conference neih a ni

Niminpiah tlai khan Prime Minister, Narendra Modi hovin State tin Chief Minister ten Video Conference kaltlangin COVID-19 avanga rampum lockdown kalpui mek leh hmalakna hrang hrang chungchangah sawihona an nei.
He Video Conference-ah hian Mizoram Chief Minister, Zoramthanga pawh telin Mizoram chu mipuiin sawrkar an tawiawm that avang leh tlawmngai leh thahnemngai taka thawhhona avanga case pakhat bak a awm belh loh thu leh tunah chuan COVID-Free State kan nih tak thu a sawi a. Chutihrual chuan he natna hrik lenna State leh ramdangin min la hual avanga lockdown chu kalpui chhunzawm zel a tul thu a sawi. Chief Minister chuan state pawna Mizoram mi leh sa tangkhang te an lo hawna turin Rel ruahman thuai tur leh Mizoram-ah Rel Station kan neih ve tawh avangin Bairabi thleng rawn phur lut ngei turin sawrkar laipui chu a ngen a ni.
He meeting-ah hian Chief Minister 30 ten thu an sawi a. Prime Minister chuan he Novel Coronavirus hi a darh zual zel lohna tura hmalak zel a, chutihrual chuan ei leh bar kawnga hmalakna ah a him chinah chuan inthlahdul zel a tul thu a sawi a. State tin atanga rawtna awm te ngaihpawimawh a nih thu a sawi bawk.
He Video Conference hi CM Office atangin CM hian chhim in, Health Minister Dr. R. Lalthangliana, Home Minister Pu Lalchamliana, Chief Secretary, DGP, Health Department Secretary leh Home Department Secretary ten an tawiawm a. Prime Minister hian nizan khan ram mipuite hnenah thuchah sawi tura ruahman a ni a, hetah hian lockdown kalpui zel dan tur pawh a puan rin a ni bawk.

Comments

Chhiar Hlawhte