Latest News

Ranchaw tharchhuah dan tur sawihona neih a ni

Niminpiah khan AH&Vety Secretary, C. Lalpeksanga hovin Task Group on Animal Husbandry & Veterinary Service and Fisheries chu thukhawmin Mizoram atanga tharchhuah hmanga ranchaw man tlawm zawk siamchhuah dan tur an sawiho.
Task Group on Animal Husbandry & Veterinary Service and Fisheries thukhawm hian Mizoram-a ranvulhtu tam zawkte hian Commercial Feed man to tak tak phai lam atanga chah-chhuah hmangin ran an vulh tih sawiin, hei vang hian State dang a ranvulhtu te an el thei lova. Hei vang hian sa, bawnghnute leh Artui man te hi a to phah ta nia ngaih niin Ranchaw man tlawm kan rama tharchhuah ngei te hman anih loh chuan mi tam tak eizawnna kawng a ping thei mai dawna a lan avangin hmalak dan tur duanchhuah nghal tul an ti a ni. Khawvel ramdangah pawh hlawhtling taka an lo kalpui tawh angin Pangbal leh Kawlbahra te ranchaw atana hman tangkai dan tur Department a mithiam ten ruahmanna siam nghal se tiin, Pangbal leh Kawlbahra te ranchaw atana process dan tur leh sum mamawh turte leh kalpui dan tur rang taka siamin department changtu Minister hovin thuthlukna siam thuai nise an ti a. Pangbal leh Kawlbahra hmang hian ranchaw man hi 20% vel laiin a tlakhniam theih an beisei a ni.
COVID-19 avanga Fish Supply Chain kalpui zel dan turah zalen taka Sangha khawitute leh Sangha zuartute an chet chhuah theih tak avangin Department lam chu in rawlh zel tul tawh lovah a ngai a. Sangha man erawh to zel lo turin department lamin lo ngaihvenin beng lo chhi zel se an ti a. Broiler Value Chain mumal taka kalpui chhunzawm a nih theih nan All Mizoram Farmers Association te nena thawhho dan tur sawiho niin, AMFA-in Department chunga beiseina a neih leh Department tih tur chin nia an ngaihte chiang zawka thlenin ruahmanna kimchang siam se an ti a. Mizo mipuiin arsa thianghlim zawk leh tha zawk ei tur an hmuh theih dan tur leh hralhchhuah dan turte pawh sawiho a ni a. Thawhhona thuthlung department in a lo duang anga, Minister hovin thutlukna siam thuai a ni ang. Hei bakah hian COVID-19 lockdown zawh hnua Livestock Sector lama hmalakna fel tak duan theih nan mipui in sa kan ei dan leh rampawn atanga sa leh ranchaw kan lakluh dan te tihchian nan Department Statistical Wing in survey nei nghal se an ti bawk.
Kan thenawm state- Assam leh Arunachal Pradesh-ah vawk hri hlauhawm tak, African Swine Fever (ASF) a len avanga harsatna thleng thei te pawh he hunah hian sawiho a ni a. He natna laka kan him theih nan State pawn atanga Vawk leh vawksa lakluh khapna chu khauh zawka kalpui zel nise an ti a. Hemi bawhzui tur hian District hrang hranga thuneitu, DC, DVO leh Police te bakah NGO te pawh hriattira ngen nise an ti bawk.

Comments

Popular News (Last 30 Days)