Latest News

Mahni thu-a rawn haw te khung leh hrem phut

ZPM Thalaite chuan tunhnaia mahni thu-a State pawn atanga rawn haw te chu Quarantine Centre-a dah tur leh Quarantine hun tawpah an chungah hremna khauh tak lekkawh zui nghal turin Mizoram sawrkar chu an phut.
Hemi chungchanga thuchhuah an siamah ZPM Thalaite chuan Mizoram sawrkar Home Secretary in tun thla ni 4-a thuchhuah a siamah Mizoram pawn North East State hrang hranga Mizoram mi leh sa tangkhang te sawrkar ruahmannaa an lo haw dan tur ruahmanna a lo haw te bak mahni thu-a lo haw mi 150 an awm thu a tarlang tih tarlangin, hetianga sawrkar hmalakna piah lama anmahni thu-a lo lutte hi an zat nen lama Home Secretary in a tarlan theih avang hian anmahni pawh an hrechiang hle ang tih a hriat theih tih an tarlang a. Chuvangin a rang thei ang berin heng mite hi sawrkarin an chhungte zawng zawng nen lakhawmin Quarantine Centre-ah dah nghal tur leh quarantine hun tawpah an chungah hremna khauh tak lekkawh zui nghal tur leh heng mite hian an lo haw hnua an Contact person zawng zawng pawh chhui chhuak nghal vek turin sawrkar chu an phut a ni.
ZPM Thalaite chuan  'Mizoram chhung ah ngau ngau chuan kan him rih niin a lang a, pawnlama mite lo lut awmze nei taka kan dan theih chuan kan him ang,' ti a Mizoram sawrkar mipuiin ngaihtuahna kan hman mek lai leh sawr-karin ruahmanna uluk tak siama tangkhangte an theih ang anga an hruailuh a, an hruailuh te pawh Quarantine Centre-a a dah nghal vek laia hetianga a ruk a rala sawrkar hriatpui loha mi 150 lai mai an lo lut hian Mizoram himna a ti derthawng hle niin an sawi bawk.

Comments

Popular News (Last 30 Days)