State Disaster Management Authority thukhawm

State Disaster Management Authority chu nimin khan an Chairman Chief Minister, Zoram-thanga hovin CM Cabinet Meeting Room-ah thukhawmin COVID-19 hrileng do tura hmalakna te an sawiho.

He Meeting-ah hian Disaster Management & Rehabilitation Department hnuaia hmalakna te leh sum hman dan te an sawiho a. COVID-19 dona atan hian sawrkar laipui in ruahmanna a siam angin State Disaster Response Fund (SDRF), 2019-2020 atangin Quarantine, Sample Collection leh Screent tihna atan 25% leh hmanrua mamawh zual (equipments, labs) atan 10% hman a phalsak angin COVID-19 dona atana SDRF 2019-2020 sum hman theih chu cheng nuai 700 a ni a. Hemi atang hian Rs. 5,35,46,448/- hman tawh niin, hman bang Rs. 1,64,53,552/- ala awm a ni.

He Meeting-ah hian District hrang hranga Quarantine Facility a awm te chu a thlawn a ei tur tum sak vek a, mi pakhat tan nitin Rs. 300 bituk a nih thu te sawi niin, State pawn-a tangkhang lo haw mi 1750 bawr vel tana sen tur zawng zawng chu Rs. 73,75,000 /-bawr vel a ni a. Heng bakah hian Rapid Test Kit mi pakhat tan Rs. 700/- zel a nih thu an sawi bawk. Hei bakah hian tunhnaia ruahsur leh thlipui avanga chhiatna hrang hrang thlengte thlirho ni bawkin, puihna pek dan te an sawiho a. Fire Tender pathum neih belh tura rawtna awm chu pawm a ni bawk.