NEC atanga sum hmuh a hun-ah hmang zo dawn

Mizoram sawrkar-a Health & Family Welfare Department chuan COVID-19 do nana North Eastern Council (NEC) atanga cheng vaibelchhe thum an hmuh chu hun bituk chhungin a hmanna tur dik takah a hmang zo hman dawn tih an sawi.

Hemi chungchanga thuchhuah an siamah Health & Family Welfare Department chuan COVID-19 hripui do nana hman tur North Eastern Council (NEC) in Mizoram sawrkar hnena cheng vbc. 3 a pek chu tangkai taka hman a nih theih nan chak taka hmalak mek zel a ni tih tarlangin, NEC hian March ni 30, 2020 khan sanction order tichhuakin, April ni 1, 2020-ah Release Order a tichhuak a, April ni 4, 2020 khan National Health Mission (NHM) account ah dah a ni tih an tarlang a. Mizoram Planning Department chuan Health Department a hriattir danin NEC Fund hi an rawn pek atanga thla hnih (May thla tawp) chhunga hman zawh tura tih a nih thu leh Health Department chuan theihtawp chhuahin sanction order an hmuh veleh a hmandan tur ruahmanna siam nghalin, sawrkar kalphung ang zelin hma a la a ni.

Mizoram sawrkarin COVID-19 dona atana Procurement atana hmalatu tur bika a ruat, Task Group on Medicine and Medical Equipment chuan Health Department in COVID-19 do nana thingtlang kilkhawr berte thlenga thawktute hman tur thil pawimawh chi hrang hrang lei tura an chhawp chhuahte chu pawmpui tawhin supply order pawh tih chhuah tawh tih an tarlang a. COVID-19 natna avanga damlote leh sample te phurtu tur Ambulance 3 pawh lei tura hmalak niin General Administration Department (GAD) pawhin phalna a pe tawh nghe nghe a. Heng bakah hian District hrang hranga COVID-19 damlo leh rinhlelhte enkawlna tura ruahman - COVID Care Centres (CCC) te, Covid Dedicated Health Centres (CDHC) te, Covid Dedicated Hospital (CDH) te tih changtlunna tur atan hman a ni dawn tih an tarlang bawk.

He Fund hman tur hun chhung hi thlahnih, May thla tawp thleng hun pek an ni na in, April ni 28, 2020 khan NEC Secretary chuan lehkha chhuahin COVID-19 Fund a pek North-East State 8 zinga State 4 - Assam, Manipur, Mizoram leh Meghalaya te chu COVID-19 do kawnga ti tha leh hmala chak bik (comparatively ahead) an nih thu te a sawi nghe nghe a. Mizoram sawrkar pawhin chak taka hma a la tih hria in a tira hun bituk aia hma, May ni 15, 2020 ralhma ngeiin sum a hmang zo thei dawn tih lehkha ah hian a tarlang tih an tarlang a. Hetianga tangkai taka COVID-19 dona tur sum NEC in a rawn pe chu lawmawm an tih thu leh NEC chungah leh Ministry of DoNER chungah lawmthu an sawi thu Health Department chuan an tarlang bawk.