India ram hmun hrang hrang atanga Mizoram mi hruaihaw dan tur sawiho a ni

Rampum-a inkharkhipna kalpui a nih mek avanga India ram hmun hrang hranga Mizoram mi leh sa tangkhang te chu hruai haw an ni dawn hnai a, tun tumah hian mi 8000 chuang hrui haw tur awmin sawrkar hmun neih in a dawl zawh loh avangin In lama inkhunghranna nei te chu In lama an inkhunghran phalsak an ni dawn a ni.

SAD Conference Hall, Aizawl-ah nimin khan Health Minister, Dr. R. Lalthangliana leh Chief Secretary, Lalnunmawia Chuaungo te hovin State danga tangkhang mek Mizoram-a lo haw tur te inkhunghranna tur kaihhruaina dan siam tawh chungchang hi sawiho a ni a. He hunah hian Health Minister, Dr. R. Lalthangliana chuan Pathian hruaina leh Chief Minister remhriatna zarah Mizoram in COVID-19 dona kawnga tun thlenga hma a lakna te chu a tha hle nia a hriat thu a sawi a. Sawrkar in Kohhrante, tlawmngai pawlte leh mipui atangin thawhhona tha tak a hmuh thu sawiin, an tawiawmna tha tak nen COVID-19 dona chu kil tin atangin theihtawp chhuaha beih mek a nih thu a sawi. Chanchinbu leh Cable TV, DDK leh AIR ten Sawrkar hmalakna puanzar kawnga theihtawp an chhuahpuina ah lawmthu a sawi bawk.
Health Minister chuan COVID-19 hian eng chen nge min tih buai dawn tih hi sawi lawk theih nilo tih sawiin, kawng engkimah mipui te kan fimkhur a, Social Distancing te, hmaituamna hman te, kutsil uar te leh khawlai-a Chil chhak loh kan ngaih pawimawh a tul mai bakah heng zawmlo te chu Dan anga hrem zel an ni tih a sawi a. Tun tuma lo haw tur te khunghranna chu fimkhur taka kalpui a tul tih sawiin, “Kan fimkhur loh chuan tun thlenga kan thil tha tih hi a vaw chhe leh vek thei a ni,” tiin, lo haw tur te chu inkaihhruaina dan engkim uluk taka zawm turin a chah a. India ram pawna tangkhang Mizote chungchang pawh Union Health Minister hova Video Conferencing an neih tumin a thlen tawh thu a sawi bawk.
He hunah hian Chief Secretary, Lalnun-mawia Chuaungo chuan nizan hmasa thlenga Mizorama lo haw tur inziaklut chu 8415 a nih thu leh an haw dan tur ruahmanna tlangpui a tarlang a. Sawrkarin Quarantine Facilities a neih zawng zawngah heng lo haw tur te hi an leng vek dawn lo tih sawiin, chu mai bakah hmun khata mi khung-hran hi a risk a san avangin mahni In lama inkhung-hranna nei te chu Village/Local Level Task Force te hriatpuina in Home Quarantine phalsak an nih tur thu a sawi a. Quarantine-na tur atana sawrkar in Hotel a thlansa ah pawh an duh chuan man chawia Quarantine theih dan Sawrkar in a ruahman mek thu a sawi bawk.
Chief Secretary chuan inkharkhipna in State economy a ti thuanawp tih sawiin, “Fim-khur taka nunphung pangngai kalpui a tul dawn a, kawng engkimah kan fimkhur mai bakah upa lam leh natna benvawn neisa te leh naupangte uluk tak kan ven a ngai dawn a, kan nunphung pangngai ah inthlakna ‘behavioural change’ kan neih a tul dawn a ni,” a ti bawk.
He hunah hian Indian Medical Association (Mizoram Chapter) President, Dr. Rosang-luaia chuan COVID-19 hripui chu mitinin kan nunpui thiam a ngai dawn nia a lan thu sawiin, “A theih chin china kan him theih nan kan nunphung pangngai te kan thlak a tul dawn a, kan inzirtir a ngai hle dawn a ni,” a ti a. COVID-19 Medical Operational Team member meeting a tel te pawhin Home Quarantine chungchanga an ngaih-dan an sawi bawk.
He hunah hian Police ten kawtthler fang-a mipui zirtirna an puanchhuah dan tur te sawiin, Kohhran Hall te Quarantine Facility a hman theih dan Kohhran hruaitute nen indawr nise, Home Quarantine a awm tur ten Dan in a phut zawng zawng an tlin em tih te leh anmahni vil dan turte rel a ni bawk.
Nimin a sawihona hunah hian sawrkar-a hemi kaihhnawih hrang hrang aiawh thahnem tak an tel a ni.

Comments

Chhiar Hlawhte