MNF in Zodintluanga bang zawk tur a ni tih an sawi

MNF Party chuan Congress MLA, Zodintluanga chu dawt sawi thin-ah puhin, bang tur an awm a nih chuan amah hi bang tur a nih thu an sawi bawk.

Nimin a thuchhuah an siamah MNF Party chuan Congress Communication Department in thuchhuah an siam ah Mizoram Assembly Speaker zahawm tak, Lalrinliana Sailo chu bang tura an phut thu an tarlan thu an tarlang a. Tunhnaiah BJP, ZPM leh MNF party pathum te hian lungrual takin sum thawh an rel tih tarlangin, a tam lam Party pathum duh dan hi Speaker hian a kaltlangpui thu leh chu chu party pakhat chauh, Congress Party in a dodal ta zawk niin an tarlang a.

May 4, 2020 khan Speaker-in a kohkhawm angin ZPM, Congress, BJP leh MNF-te chu an Legislature Party Leader theuh an kalkhawm thu leh chu Meeting chuan minute siamin, “Member kalkhawmte chuan COVID-19 hrileng dona, invenna leh hrileng avanga chhawmdawlna atana MLA hlawh leh MLALADS Fund-te pawh a tul anga thawh an inhuam thu sawiin, a situation azira MLA hlawh leh Local Fund atanga pek chungchang chu a tul anga la ngaihtuah nise, mahni Legislature Party theuhah lo sawiho turin lungrual takin rel a ni,” tiin minute an dah tih an tarlang a. Hetiang thu dah an nei chung hian Congress Leader, Zodintluanga chuan party bila thangthat lak tumin Press Statement siamin dawt a sawi kual ta chiam nia tarlangin, he Meeting-ah hian MLA Fund leh hlawh chungchang an sawi lo niin a sawi tih an tarlang a.

Hei bakah hian May 8, 2020 khan Zodintluanga hian ramri a fanna hmun atanga video siamin, ni 7.5.2020-a Speaker kaihhruainaa Party hrang hrangin sum thawh dan sawikhawm leh turah sum thawh lam Agenda-ah a awm mumal loh thu a sawi nia tarlang bawkin, Assembly Commissioner chuan fiah takin Committee koh a nih thu leh an Agenda tur hi chiang takin a hrilh tih hriat a ni tih an tarlang bawk. MNF thuchhuah chuan Zodintluanga’n a dawt vawikhat sawi thup nana dawt dang a sawi belh zel a ngai ta chu zialo an tih thu pawh an thuchhuah ah chuan tarlangin, “Bang tur an awm a nih chuan dawt sawi thin Pu Zodintluanga Congress MLA hi a bang tur a ni ang. A MLA puite phatsan a, mipuite dawt hrilhtu Pu Zodintluanga hi a bang zawk tur a ni,” an ti bawk.