MZP hruaitu ten inkharkhip laia CADC huamchhunga harsatna tawk Zohnahthlak te an tlawh

MZP General Hqrs. hruaitute chuan Inkharkhipna kalpui anih avanga Chakma Autonomous District Council (CADC) Area-a harsarna tawk Zohnahthlak unaute tlawhin hun an hmanpui.

CADC Area-a Zohnahthlak te tlawhtu MZP General Hqrs. hruaitute hian Zirtawpni khan Parva khua tlawhin Parva-I, II, III leh IV-a khawtlang hruaitute leh NGO hrang hrangte Meeting neihpui in ram neitute lakah harsatna siam nawn lo turin an hrilh a. He hunah hian MZP General Hqrs. Vice President, Peter Chhangte chuan Parva leh a chhehvel khua chu CADC area mah nise, kan pi leh pu te hun atang tawh a kan ram luah chin a ni tih sawiin, a neitu tak tak chu Zofate niin, a ram neitu zawkte dodalna leh thlei bikna awm thin chu MZP chuan angai thiam thei lo tih a sawi a. COVID-19 vanga inkharkhip leh engkim harsat laia a ram neitute ei leh in tur lei ve phallohna awm te chu thleng nawn tawh lo se an duh thu leh khua leh tui tha ni turin Parva leh a chheh vela hnam zawng zawngte chu a chah a ni.

MZP Vice President chuan CADC area chhunga Mizo chengte harsatna tawh leh enhran an ni fo chu Mizote hmuhsitna leh zahlohna ah MZP chuan angai tih pawh sawiin, Chakma leh Tuikuk ten Mizote kut an thlak fo leh harsatna an siamfo pawh MZP in a en liam mai tawh dawn lo tih a sawi a. Pawikhawihtute leh hnamdang te chu an phu ang tawkin a thungrul zel dawn a. Parva leh a chhehvel khuaah Mizo ten harsatna an tawk leh anih chuan a hmunah Mizo thalai an kal leh tur thu a sawi bawk.

He hunah hian MZP General Secretary, Lalnunmawia Pautu pawhin Parva-III khua a Zohnahthlak te nekchep an nih leh eitur lei ve phallo tu hnamdang te chu MZP in a dem tih sawiin, CADC area-a development kal danah Mizo khuate kal kan an ni fo chu CADC area chhunga thuneitute an dem thu leh Mizoram Sawrkar pawh rang taka hmala turin an ngen tih a sawi a. CADC area chhungah Kristian ten dodalna tam an tawk fo thin leh chi leh chi inthliarna vanga invauna a thleng thin chu a pawi hle tih sawiin, hetiang thil a thleng leh anih chuan CADC area chhunga Zofa chengte thlavang hauh turin CADC Area-ah hian Mizo thalai an kal tur thu a sawi bawk.

MZP hruaitute chuan Parva-III khuaa cheng Bawm unau chhungkaw 60 hnenah buhfai bag engemawzat leh Alu Bag pe in, Vaseikai Young Lai Association (YLA) hruaitute hnenah leh Damdep-II Mizote hnenah chhungkaw harsa zawkte tan buhfai an pe bawk.