Union Health Minister hovin NE Health Minister ten COVID-19 dona kawnga hmalak dan an thlirho

Union Health Minister, Dr. Harsh Vardhan hovin Inrinni khan COVID-19 dona kawnga hmalak dan leh dinhmun thlirhona neih niin he hunah hian Health Minister, Dr. R. Lalthangliana chuan Union Health Minister hnenah hian India ram pawna chhan hrang hrang vanga Mizo tangkhang mekte hruai haw an nih theih nan hma lak sak turin a ngen.

Union Health Minister, Dr. Harsh Vardhan hova India hmarchhak-a Health Minister leh Health Department Officials ten COVID-19 dona kawnga hmalak dan leh dinhmun thlirhona Video Conference-ah hian Mizoram Health Minister, Dr. R. Lalthangliana chuan COVID-19 do kawnga Mizoram sawrkar hmalakna hrang hrang sawiin, Chief Minister kaihhruaina hnuaiah ruahmanna fel tak siam anih thu a sawi a. Rapid Antibody Testing mumal taka kalpui anih thu te, Zoram Medical College (ZMC) chu COVID-19 Dedicated Hospital a ruahman a nih thu leh tha taka kalpui mek a nih thu bakah ZMC-a Sample Testing Laboratory-ah pawh Sample test tluang taka kalpui a nih thu a sawi a. Hei bakah hian District tinah COVID Care Centre (CCC) siam a nih thu leh Dedicated Covid Health Centre (DCHC) ruahman fel a nih thu pawh sawiin, heng DCHC-ah te hian ICU a awmlohna ah pawh Isolation Ward dah vek a nih thu a sawi bawk.

Health Minister chuan State pawn atanga Mizoram-a rawn lute Screening uluk taka neih thin a nih thu leh sawrkar Quarantine Facilities-ah khunghran zel an nih thu pawh sawiin, Mizoram chu International border pahnih Myanmar (KM 404) leh Bangladesh (KM 318) nen inri a nih avangin luhruk theihna hmun 200 chuang a awm thu leh a ven hna a hautak em em tih Union Health Minister hi a hrilh a. Mizoram Police leh Village Task Force ten rim tak leh chhel taka chhun zan zawma an vil thu Dr. R. Lalthanglian chuan sawiin, Village/Local Level Task Force chu Sawrkar, NGO leh khawtlang hruaitute tang tlangin an din a nih thu a sawi a. Hei hian thawhhona tha tak a siam phah a ni, a ti a. Anni bakah Chief Secretary kaihhruaina hnuaia District Level Task Force, State Level Task Force, Health Department, Home Department leh sawrkar Department hrang thangte thawhhona fakawm a tih thu leh India rampum tan pawh entawntlak ni a a hriat thu a sawi bawk.

Hei bakah hian Mizoram-a COVID-19 vei pakhat enkawl mek chu a dam tawh thu leh Inrinni khan damdawi In atang chhuahtir a nih thu Health Minister chuan a sawi bawk a, Mizoram chu India ram lockdown a nih hma a lockdown lo kalpui tawh a nih thu leh Airport screening pawh a ti hmasa ber a nih thu sawiin, tun dinhmuna kan la him chhan pawh heng vang hi a ni pakhata a hriat thu a sawi bawk.

Health Minister chuan COVID-19 chung-changa India ram hmun hrang hranga Mizo awm te dinhmun a tarlan bakah India rampawna Mizo-ram mi leh sa 500 chuang zet, a tam ber chu thalai hnathawka chhuak an awm tih thu sawiin, India sawrkarin ram pawna tangkhang mi 15,000 vel a hruai haw tawh zingah Mizoram a chengte an la tel ve lo tih a sawi a, him dam taka hruai haw an nih chu Mizoram sawrkar pawhin a ngai pawimawh hle tih sawiin, a rang lama hma la turin a ngen bawk.

Union Health Minister pawhin Mizo-ram in COVID-19 do kawnga hma a lakna ah a lawmthu sawiin, a bik takin YMA te chu lawmthu a hrilh a, a hminga chibai pawh lo hlan turin Mizoram Health Minister hi a chah a. Mizo-ram pawna tangkhangte pawh an lo let nan theihtawp an chhuah tur thu te, karkhat chhung leka PCR Laboratory an ti puitling theite lawmawm a tih thu a sawi bawk a. Dr. R. Lalthangliana chuan Sawrkar laipuiin Mizoram in COVID-19  leh hriselna tih hmasawnna tur thil hrang hranga mamawh a thlente a ngaihtuahsak thin avangin Minister hnenah hian lawmthu a sawi bawk.