COVID-19 dona a sum tlingkhawm Sawrkar thunun theihloh Committee in a vil ZPM in an duh

ZPM Party chuan COVID-19 dona atana sum thawh tlingkhawm te chu sawrkarin a duh duha a thunun theih loh, Audit Committee-in vil se an duh thu an sawi.
Inrinni-a thuchhuah an siamah ZPM chuan ram neitu mipui ten hripui dona kawngah sawrkarin puih a mamawh ni a hriain an theihna zawn theuhah tha an thawh mek ni a sawiin, Chief Minister Relief Fund-ah sum thawhkhawmin MLA Fund pawh MLA pakhat atangin cheng nuai 50 theuh pawhlet tura rel mek a ni, an ti a. Hetianga hripui dona tur mipui pawisa thawh tlingkhawm hi sawrkarin a duh duha a thunun theihloh, Independent Audit Committee in vil ngei se, chu Audit Committee-ah chuan mi hmingtha, party hawi zawng neilo te leh Audit lama mithiamte tel ngei se tih chu ZPM duhdan a ni, an ti.
Mizoram sawrkar sum dinhmun dik tak pawh a puan chian hma hauha sawrkar hnathawkte hlawh atanga pawisa thawh luih tir tumna awm mek chu ennawn tul an tih thu pawh sawiin ZPM chuan, “Chief Secretary-in, 'Sum an thawh dante an service record-a chhinchhiah tur a ni' ti a a sawi thu tualchhung chanchinbua lo lang hian anmahni phalna reng ni lova tihluihna, a thawh ve duhlo te chunga thiam taka kutthlak tumna a anga, tihluihnaa an hlawh cut sak tumna a kawk bawk a, a tha lo hle a ni,” an ti a. Mizoram sawrkar hian fiahfai takin COVID-19 dona atana sum mamawh dante tha takin puang chiang phawt se, chumi hnuah sawrkar hnawthawkte hlawh hial thawh tir ngaia sum dinhmun tha lova Mizoram a ding a nih chuan sum inrenchemna kalpui hmasa phawtin chumi hnuah sawrkar hnathawkte chu an hlawh atanga thawhtir ve chauh tura an duh thu an sawi a. Mipui rilru dam na'n mi thahnemngai leh mi inphalte sum thawh tlingkhawm CM Relief Fund leh Fund dang hman dante uluk taka vilin, mipui hnena thudik hrilh zel turin ZPM chuan hma a la zel dawn tih an thuchhuah ah chuan an tarlang bawk.

Comments

Chhiar Hlawhte