MYC Chairman in Lunglei Civil Hospital-ah hlan

Lunglei North bialtu MLA leh Mizoram Youth Commission Chairman ni bawk, Dr. Vanlaltanpuia chuan nimin khan Lunglei Civil Hospital-a Medical hnathawktute hman turin COVID-19 hrileng laka invenna hmanrua PPE, Glove leh disinfectant te a hlan.
Heng hmanrua te hlanna puala inkhawm tawi neih ah MYC Chairman chuan khawvel pum tibuai mektu COVID-19 hripui beih let kawngah Chief Minister, Zoramthanga leh H&FW Minister, Dr. R. Lalthangliana leh ram hruaitu dangte kaihhruaiin Sawrkar chuan theihtawpa hma a lak zel thu a sawi a, COVID-19 avanga hun khirh tak kan tawn mek lai hian Sawrkarin a tum ber chu mipui mamawh a rang thei ang bera phuhruk a ni, a ti.
MYC Chairman chuan COVID-19 do kawngah Mizoram mipuite kan tangrual tha chu a lawmawm takzet tih pawh sawiin, sawrkar hnathawk te, VLTF-te, NGO, VC leh Media-te, phal taka tanpuina thawhtu mimal, pawl, Kohhran bakah Mask, PPE leh Hand sanitizer siamtu mi thahnemngai tak takte chu chhuanawm a tih thu a sawi. PPE leh hmanraw dangte chu medical hnathawktuten tangkai taka an hman a beisei thu a sawi bawk.
MYC hmalakna te pawh sawilangin, Mizo thalaite fuih thar tur leh kawng kawhhmuh turin  MYC chuan karleh ah khian Live Show ‘Thalaite Tukverh’ a buatsaih tur thu a sawi a, Career Guidance neih a nih dawn bakah Sports discipline hrang hrang leh Fashion & Entertainment lama hlawhtlingte an kawm dawn tih MYC Chairman chuan a sawi bawk.

Comments

Chhiar Hlawhte