Hripui leng kar-a thisen pe turin sawm

Health Minister, Dr. R. Lalthangliana chuan hripui leng karah damlo mamawhte tan leh nunna chhan nan thisen pe chhunzawm zel turin mipuite a sawm.

Thisen pek chungchanga mipuite hnena thuchah a tihchhuah ah Health Minister, Dr. R. Lalthangliana chuan COVID-19 hripui leng karah natna dang avanga damlo tam tak te nunna chhan nan thisen mamawhna chu a la sang em em reng tih sawiin, he hripui len chhunga thisen mamawh tlakchham a awm loh nan theihtawp chhuaha tan kan lak tlan a ngai tak meuh tih a sawi a. Damlo mamawhte tan leh nunna chhan nan he hripui leng karah hian thisen pe zel tura mipuite chu ngenin, Thisen petu turte leh a lo buaipuitu zawng zawng te pawhin he hripui len laia Thisen pek dan tura inkaihhruaina, `Mizoram State Blood Transfusion Council’ in a siam chu zawm hram tur leh COVID-19 laka invenna tura Hmaituamna hman te, Kut fai taka sil fo te, Metre khat aia hnaiah midang awm hnaih loh tur tih hi hre reng turin a chah a. Thisen pek chungchangah Sawrkar hmalakna thawhpui zel leh hemi kawnga hma la tura Association for Voluntary Blood Donor (AVBD) an lo awm chu Mizoram mipui tan a thlamuanthlak hle tih a sawi bawk.