Latest News

Myanmar ramri-a Duty turin Serchhip Sub-Hqrs. YMA hruaitu rual te an fehchhuak

Serchhip Sub-Hqrs. YMA hruaitu rual te chuan COVID-19 laka Mizoram a him theihna tura an huamchhung, Myanmar ramri a duty turin nimin May 11, 2020 zing khan Serchhip an chhuahsan a, tunkar chhung an Duty dawn a ni.
Mizoram leh Myanmar ramri a duty turte thlahna puala Inkhawm tawi nimin zing-a Serchhip Bazar Traffic Point-a neih hi Serchhip DC leh District Level Task Force on COVID-19 Chairman, Dr. Lalzirmawia Chhangte chuan hmanpuiin tunlai in khawvel pumin hrileng avanga harsatna kan tawh thu leh kan himna tura ramri a duty te pui tura Serchhip Sub-Hqrs. YMA hruaitute an fehchhuak chu lawmawm a tih thu a sawi a. He hrileng laka keimahni, kan chhungkua leh kan khawtlang a him theihna turin sawrkar in inkaihhruaina a siam te kan zawm a tul thu a sawi a. Sawrkar in inkaihhruaina a siam- mahni inkhunghran, awmkhawm loh, kut silfai fo leh Village Level Task Force te thu zawm te chu thil harsa lo leh mitin ten kan tih theih vek a nih thu sawiin, hei hi ngai pawimawh reng turin mipuite chu a chah bawk.
Heng ramri a duty turte thlahna puala Inkhawm tawi hi Serchhip Sub-Hqrs. YMA President, R. Sanghmingthanga chuan kaihhruaiin Duty tura ruahmanna an siam dan te a sawi a. Serchhip-VII VLTF member, Rev. H. Lalawmpuia chuan heng duty a kal turte hi tawngtai-a thlahna hun a hman hnuah Serchhip DC hian a vailiam a ni.
Serchhip Sub-Hqrs. YMA huamchhung ah hian ramdang, Myanmar nena ramri KM 14 vel awmin heng hmun ah hian Sailulak Branch YMA leh Lungkawlh Branch YMA te duty in Serchhip Sub-Hqrs. YMA hian Bawm an hunna atangin Rs. 30,000/- chu tanpuina an lo pe tawh a. Amaherawh chu duty hun hi a rei zel avangin Duty pui relin tun tumah hian SEC Member te duty hmasa tura ruahman a ni a. A hmasa atan Sub-Hqrs. YMA President, R. Sanghmingthanga leh Secretary, Lalrammawia hovin Team 2 an kal a, Team pakhat hi Lungkawlh-ah duty in pakhat hi Sailulak-ah an duty anga, tunkar Nilaini zan thleng duty in Ningani ah midang in an thlak leh anga, Team khat ah hian mi 4 zel an awm a ni. Heng ramri-a Duty te hman tur hian Serchhip DMS, Dr. ZD. Lalmuanawma chuan Thosilen 8 leh damdawi mamawh hrang hrang a pe bawk a ni.

Comments

Popular News (Last 30 Days)