Forest Minister hovin Officer ten Meeting an nei

Environment, Forests and Climate Change (EF&CC) Minister, TJ. Lalnuntluanga hovin nimin khan Principal Chief Conservator of Forests (PCCF) Conference Hall, Aizawl-ah Video Conference hmangin Meeting neih a ni a. Mizoram puma Forest Division 25-a Divisional Forests Officer (DFO) te leh Officer pawimawh dangte an tel a ni.

He hunah hian Forest Minister chuan COVID-19 avanga Mizoram leh khawvel hmun hrang hrangin harsatna a tawh avangin Meeting tura kalkhawm leh thutkhawm a harsa tih sawiin, hetianga Video Conference kaltlanga meeting koh hian hun leh tha, zin veivahna atana sawrkar sum leh pai tam tak luangral tur a veng tih a sawi.

Minister chuan COVID-19 avangin ram pumah khauh taka inkhuahkhirhna kalpui a nih chhungin EF&CC hnuaia thawktu engemaw zat chu hripui leng karah pawh chawl hlei thei lovin ramin a mamawh avangin an penchhuak tih a sawi a. Thawktute inpekna leh thahnem ngaihna avanga lawmthu sawiin, hun harsa tak kan tawh mek karah an mawhphurhna hneh taka an hlen chhuah avangin chhuanawm a tih thu a sawi bawk.

He Meeting-ah hian Agenda pasarih (7) sawiho a ni a. Chung zingah chuan Green India Mission (GIM) kalpui dan te, inkhuahkhirhna awm mek laia forest kaihhnawih dan bawh-chhiatna ven hna leh dan lek kawh a nih dan te, Green Mizoram Programme hnuaia thingkung lian chi (tall seedlings) kui tiah chungchanga hmalakna te, Reversed Forest huamchhunga ram pass cancel chungchang te, CAMPA hnuaia DFO tin ten ruahmanna an siam te leh Rawhling (bambusa bambos) tiak lakkhawm chungchang a DFO te hmalakna ngaihthlak a ni a. Inkharkhip chhunga an hmalakna thlirletna neih a ni bawk.