Vawiin atanga Lockdown thawh 3-na kalpui tur atan inkaihhruaina tihchhuah a ni ta

India rampum-a inkharkhipna kalpui mek chu Vawiin atang hian a thawh thumna atan kalpui a ni leh dawn ta a, Mizoram Chief Secretary leh State Disaster Management Authority-a State Executive Committee Chairman, Lalnunmawia Chuaungo pawhin tun thla ni 17 thlenga hman turin inkhuahkhirhna Dan thar a tichhuak tawh a ni.

Disaster Management Act, 2005, Section 22(2)(h) & 24(1)-in thuneihna a pek anga inkhuahkhirhna Dan thar tihchhuah ah chuan International Border leh Inter-State Border khar mek te chu khar chhunzawm an ni anga, Bairabi, Vairengte leh Kanhmun kaltlang kawngpui te erawh chu Essential Commodities leh phalna nei bungraw dang phur lirthei te tan hawn a ni anga. Mipui zin veivahna lirthei erawh chu Home Department phalna neite tan lo chuan khap tlat a ni thung. Mizoram-a lo lut reng reng chu Entry Point-a Screening Centre-ah uluk taka screening kalpui chhunzawm zel a ni anga, lirthei khalhtute leh handyman te tana zawm tur hrang hrang pawh ruahman leh niin phalna bik neia Mizoram-a rawn haw te chu an hriselna uluk taka endik an nih hnuah chawl khawmuang lovin an kalna tur District-ah an tlang nghal anga. An District chhunga Quarantine Facility remchang berah ni 14 chhung Quarantine an ni anga, Medical Board in a recommend chuan ‘Home Quarantine’ phalsak an ni ang.
State pawn atanga bungraw lakluh theih zingah nitin mamawh (Essential Commodities) te chu phalna hranpa lak ngai lovin lakluh theih a ni anga, amaherawhchu, mCOVID-19 mobile application-a mPass hmangin declaration an thehlut ngei ngei tur a ni thung a. Nitin mamawh ni lo (Non-Essential Commodities) bungraw dang la lut tur te erawh chuan mCOVID-19 mobile application-a mPass hmangin Home Department phalna an la hmasa tur a ni thung a. Mizoram chhung bika bungraw phurh leh thiar te tan phalna hranpa lak a ngai lovang.
Dawr, sumdawnna hmun leh eizawnna kawngah ‘Standard Operating Procedure (SOP) for Social Distancing’ zawm chunga kalpui tur niin khawpui chhung bikah, hmun lunlai/dawr kawn-a dawr inthenawm te chu nikhat kar danah an inhawn chhawk tur niin a ni zawn-in dawr pakhat in hawn phal a ni lova, dawr inthenawm pawh a ruala hawn phal ni lovin hei hian mihring leh ran damdawi dawr leh clinic-te a huam lo thung.
Public Park, Picnic Spot, Movie Theatre, Gym, Spa, Beauty Parlour, Community Hall, Bazarpui, Shopping Complex, Mall leh intawl-lenna hmun chu khar chhunzawm tur niin Tuallai leh kawtthlera thil zawrh chu khap a ni a, dam-dawi dawr tihloh dawr dang zawng chu tlai dar 5:00-ah khar vek tur a ni.
Zirna In, Training Institute leh Sakhaw biakna hmun te chu khar zui tur niin hei hian an Administrative Office hna pangngai kalpui erawh a huam lo thung a, Mipui punkhawmna- inneih lawmna (reception), lungphun, anniversary leh birthday lawmna, Games & Sports, Book Release, Politics leh pawl thila kalkhawmna, intihhlimna ang chi reng reng huaihawt phal ni lovin Inneih inkhawm leh mitthi vuina-ah mi 20 aia tam punkhawm khap a ni bawk.
Tul bka phalna pek te tan lo chuan Inter State a zin leh veivah khap niin khaw kar kawng ah passenger phur lirthei (commercial passenger vehicle) te tlan phalsak an ni a. Heng lirtheite hi registration number ‘odd-even’ angin an intlan-chhawk thung ang. Odd number lirthei te chu Thawhtanni, Nilaini leh Zirtawpni-ah an tlan anga. Even number lirtheite chu Thawhlehni, Ningani leh Inrinni-ah an tlan thung anga. Sunday-ah lirthei tlan phal ni lovin Passenger thut theih zat (seating capacity) atanga 50% chauh an phur thei ang. Khawchhunga service Bus, Taxi leh Auto Rickshaw te pawh hetiang hian intlanchhawk anga, tul bik thila Private motor tlan te pawh ‘odd-even’ angin hetiang hian an tlan thei dawn bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn