Mizoram sawrkar in PPE a lei chungchangah MPCC in ACB-ah FIR an thehlut

Mizoram Pradesh Congress Committee (MPCC) Media Department chuan Mizoram sawrkarin Personal Protective Equipment (PPE) a lei danah thil fello tam tak a awm avang leh PPE thalo tam tham tak lei chungchang chhuichian a nih theih nan nimin khan Anti-Corruption Bureau, Aizawl-ah FIR an thehlut.

Hemi chungchanga thuchhuah an siamah MPCC Media Department chuan Mizoram sawrkarin March 27, 2020-a Air India Cargo Plane hmanga Lengpui Airport-a PPE leh hmanraw dang a chah thlen zinga PPE tam tham tak chu hman tlak loh, a chhia a ni tih hriat a ni tih tarlangin, tunhnaiah Tripura-ah COVID-19 Test Kit leh Hand Sanitzer lei chungchangah cheng nuai 34 zet tihchingpen a awm ni a hriat a nih avangin Health Secretary leh National Health Mission (NHM) Director-te chu an hna atanga chawlhtir an ni a. Manipur-ah pawh N95 Mask leh hmanraw dang tha tawklo supply avangin Health Department Official engemawzat thubuai siamsak an ni tawh bawk tih an tarlang a.
MPCC Media Department chuan Mizoram sawrkarin PPE a lei danah thil fello tam tak a awm nia sawiin, PPE tha lo tam tham tak a lei avangin pawisa tamtak a luanral thu leh mipui Chhiah pek tlingkhawm nuai engemaw zat luanral chungchangah hian chhuichian ngai thil engemawzat awm a hriat a nih avangin FIR hi an thehlut ta tih an sawi a. Hetiang hun khirh tak a lo thlena mipui Chhiah pek tlingkhawm, sawrkar sum hman dan uluk taka lo check hi oppostion party tih tur dik takah an ngaih thu leh dikna duh vang leh awmze nei lova mipui sum luangral zel tur venna atan FIR hi thehluh a nih thu leh Mizoram sawrkarin ACB kut phuar lo a, zalen taka he thil hi chhui a nih ngei an beisei thu an tarlang bawk.
MPCC Media Department in an Secretary, C. Lalhriatpuia hminga SP, Anti Corruption Bureau-a FIR an thehluh ah hian March 27, 2020 (Friday) khan Mizoram sawrkar chuan Air India Cargo Airbus 319 hmangin Lengpui Airport-ah PPE (Personal Protective Equipment) set 10900 leh hmanraw dang, a vaiin kg. 1979 a rit a chah thleng tih tarlangin, COVID-19 laka invenna tur PPE lei dawn hian approved supplier leh PPE siamtu sawrkar pawmpuina neite hnen atanga proper channel-a lei a ni lo tih an tarlang a. Hei hian sawrkar thuneitute leh PPE hralhtute inkarah corruption awm theihna chance tam tak a siam bakah, kalphung pangngai anga lei a nih loh avangin a chhia thleng leh theihna kawng a ti ping ni a ngaih a nih thu leh State Purchase Advisory Board a paltlanglo a nih phei chuan dan bawhchhiatna lian tak a awm tihna a nih thu an tarlang a.
Delhi atanga PPE leh bungraw dang lei nan hian Mizoram sawrkar pawisa Rs. 99,95, 200/- zet hman ni a hriat a nih thu leh, Thlawhna hire nan ringawt pawh Disaster Management & Rehabilitation pawisa Rs. 16, 23,000/- zet hman a nih thu tarlangin, heng pawisa te hi mipui chhiah pek tlingkhawm leh awmze nei taka hman tur a ni bawk tih an tarlang a. Pawisa heti zat senga bungraw lei zingah hman tlakloh tam tham tak a awm chu a pawi takzet tih tarlangin, “Mipui pawisa nuai tam tak awmze nei lo a luanralna kawnga mawhphurtute hi hrem ngei tur an ni,” an ti bawk.
MPCC Media Department chuan PPE hi COVID-19 dona kawnga frontline-a awm damdawi lama thawkte hman tur a ni ber tih pawh tarlangin, hetianga PPE chhia lei teuh hi damdawi lama thawk zawng zawngte tan a him lovin, dinhmun hlauhawm takah Mizoram sawrkarin a dah tihna a ni tih an tarlang a. Hetiang a nih avang hian Mizoram sawrkarin COVID-19 dona kawnga PPE leh hmanraw dang a lei danah thil fello tam tak leh dan bawhchhiatna engmawzat a awm tih a chiang tih tarlangin, heng zawng zawng hi chhuichhuaka a mawhphurtu chunga Dan anga action lak a nih theih nana hma lak sak turin an ngen bawk.

Comments

Chhiar Hlawhte