Chief Minister hovin COVID-19 hrileng kara ramri uluk zawka ven dan tur ngaihtuah a ni

Nimin khan Chief Minister, Zoramthanga hovin Home Department hotute leh Assam Rifles bakah BSF hotute chuan COVID-19 hripui leng mek kara State chhung a him theihna tura International leh Inter-State Border a venhimna hna kalpui mek thlirhona leh hmalak zui zel dan tur sawihona an nei.

CM Office Cabinet Meeting Room-a he sawihona hunah hian Home Minister, Lalchamliana leh Chief Secretary, Lalnunmawia Chuaungo bakah Home Department hotute, Assam Rifles leh Border Security Force hotute telin Chief Minister chuan tuna hripui leng kan buaipui mek hi engtin nge a awm zel dawn kan hrelo tih sawiin, amaherawh chu Border ven uluk hi kan chhunzawm zel erawh a pawimawh dawn a ni, a ti a. BSF leh Assam Rifles te chu an duty te uluk leh ngawrh taka ti chhunzawm turin a fuih bawk.

He Meeting-ah hian ramri a duty dan phung chu uluk leh awmze nei zawka kalpui a nih theih dan tur sawiho niin, Furpui lo thleng tur rilru-ah dah chungin indaihzai thei ang bera duty-te insemrual dan tur ruahmanna thar pawh siam nise, an ti a. BSF, Assam Rifles leh Mizoram Police te leh Village Level Task Force duty te chu thawhhona tha zawk an neih theih nana ruahmanna siam nise tia rel a ni bawk. He hunah hian Assam Rifles leh BSF hotute chuan tuna ramri kan tur ven hna kalpui mekah VLTF te thawhpuina chungah lawmthu sawiin, an hmalakna tha an tih thu an sawi a. Duty dan phung inanloh avangte in heng Force hrang hrangte inkarah leh tualchhung mi te nen inpawh zawka thawhho theihna turin ruahmanna siam tura rawtna chu tha an tih thu an sawi bawk.

Tunah hian Assam Rifles hian India leh Myanmar nena inrina lamah duty in, hmun 50 dawn ah Company 22 an indah a. BSF hi Bang-ladesh nena inrina ah duty in, hmun 40 chuang ah Company 24 an indah bawk a. Heng international border pahnih ah te leh Inter-State Border ah te Mizoram Police leh VLTF te duty bawkin, International border-a VLTF duty zat hi tun dinhmunah mi 1,076 leh Inter-State Border a duty mi 508 an awm a. Mizoram Police hi COVID-19 atan bik hian Border venhim hna thawk tur te, Law & Order keng kawh tur te, Quarantine Centre venhim hna leh Contact Tracing hna thawk tur te a intirchhuakin, tun dinhmunah heng atan hian mi 2,906 an duty mek a ni.