District Council ten hri dona kawngah hma la

Zonuna Kawlni (LENKAWL) • May 1, 2020 • Comments • Mizoram
Lai Autonomous District Council (LADC) huamchhunga cheng mipuiin COVID-19 hri leng vanga harsatna an tawh chhoh mek leh an la hmachhawn turah LADC sawrkar chuan Buhfai lei khawl tumin hma a la mek.
He thu hi LADC CEM Pu T. Zakunga chuan nimin khan amah kawmtu Lawngtlai District MJA Member te hrilhin LADC sawrkar Budget pawh her danglam a tul mai thei tih a sawi a. Ram mipuite chhuan-chhama an awmloh nan Buhfai Quintal 1000 tal lei khawl tuma hmalak a ni a; Lawngtlai East bialtu MLA, H. Biakzaua’n theihtawp a chhuah-pui a, Supply Minister pawh biakpawh a ni tawh, a ti bawk. LADC CEM kawmtu Lawng-tlai MJA Member te hian tun hrileng vanga LA-DC CEM Relief Fund chhunkhawm mek chu a tam thei ang ber a pawisa faia semchhuah loh dan ngaihtuah ni se an duh thu an thlen bawk.
Hetihlai hian nimin a Chakma Autonomous District Council (CADC) sawrkar hotulu te Kamalanagar CADC Conference Hall-a thu-khawm chuan MDC LAD Fund atangin Cheng nuai 20 chu COVID-19 avanga harsatna lo thleng hrang hrang sutkian nan dah nise, an ti a. CADC CEM, Rasik Mohan Chakma kaihhruai thut-khawmah hian MDC te an tel tha thawkhat hle a, MDC LAD Fund dah hran hman dan tur leh hman dan viltu tur Committee din ni se, an ti bawk.