Mizoram House (Salt Lake), Kolkata-a awm mi 18 te Quarantine Centre-ah dah an ni

Health Minister, Dr. R. Lalthangliana chuan Mizoram House (Salt Lake), Kolkata a awm mek zinga Mizo 18 te chu Quarantine Centre-ah dah an nih thu a sawi.
Health Minister Dr. R. Lalthangliana hian nimin chawhnu khan West Bengal sawrkara Minister of State for Health & Family Welfare, Chandrima Bhattacharya-i chu bia in Kolkata-a Mizo Cancer vei enkawllai mi pahnih ten COVID-19 an kai tih hmuhchhuah a nih hnu niminpiah tlai-a an inbiak veleh rang taka hma a lo lak avanga lawmthu hrilhin, COVID-19 vanga West Bengal-a Mizo ten harsatna dang an tawk leh a nih pawha theihtawp chhuaha tan lo lakpui nghal zel turin a ngen a. Chandrima Bhattacharya-i pawhin theihtawp an lo chhuah zel tur thu in a chhang a ni.
AMRI Hospital, Kolkata a Mizo Cancer vei damlo pahnihin COVID-19 natna an kai a ni tih hriat a nih veleh hian Health Minister Dr. R. Lalthangliana chuan West Bengal Health & Family Welfare hi be nghalin ani hian Doctor thiam bik pakhat Kolkata Mizoram House (Salt Lake)-ah a tir nghal a, Mizoram House Joint Resident Commissioner, Jacob Lalawmpuia nen ruahmanna siamin hma an la nghal a. COVID-19 natna kai damlo pahnih te hi COVID-19 vei dahna tur bika ruat Hospital-ah dah nghal niin, a tul ang angin contact tracing an ti chhunzawm nghal a, Mizoram House (Salt Lake) a awm mi 18 chu nizan hmasa dar 9:00 khan Kolkata a Quarantine Centre tha takah dah nghal an ni a. Mizoram House (Salt Lake) a thawk hnamdang pakhat pawh nimin khan Quarantine Centre-ah dahluh leh a ni bawk.
Health Minister chuan Kolkata-ah Mizo COVID-19 vei hmuhchhuah chu pahnih chiah an la awm tih sawiin, thuthang diklo vanga chi-ai lo turin mipuite a chah a, nimin lama Cancer vei pakhat dang COVID-19 positive thar awm anga sawi pawh chu thudiklo a ni tih a sawi a. Kolkata Mizoram House Joint Resident Commissioner pawh bia in an dinhmun te Chief Minister, Zoramthanga’n a hriatpui thu leh a ngaihven reng thu hrilhin harsatna leh tanpuina an mamawh chuan Chief Minister hovin an inhawng reng a ni tih a hrilh a ni.

Comments

Chhiar Hlawhte