Mizoram-ah chawlhkar hnih dang inkharkhipna kalpui zui leh a ni dawn

Chief Minister, Zoramthanga hova nimin-a Council of Ministers thukhawm chuan COVID-19 avanga lockdown (inkharkhip) kalpui mek chu India sawrkarin a lo tih tawh angin Mizoram tan chawlhkar hnih dang, May ni 17 thleng la chhunzawm ve nise tiin a rel.

Nimin a Chief Minister Office Cabinet Room-a Council of Minister thukhawm hian Lockdown kalpui chhunzawm a nih chhunga inkaihhruaina turte an sawiho a. Inkaihhruaina chu Chief Secretary kaihhruai State Level Task Force-in Mizoram dinhmun enin a duan tur thu Chief Minister chuan a sawi a. Hripui leng kara mipui him tlanna tura sawrkar thupek, a bikin State chhunga inkharkhip kaihhruaina bawhchhia a midangte nunna ti derthawng thei a chet khap leh hrem theihna tura duan, Ordinance for Containment and Prevention of Covid-19 tih Health & Family Welfare Minister chuan chhawpchhuakin he hunah hian sawiho niin an pawm a. He Ordinance hnuaiah hian mipui himna tura khapna thupek bawhchhetute hrem theih dante sawifiah a ni a, Larsap-in a pawm hunah hman nghal a ni ang. Chief Minister chuan ramri-a khaw chhe hnuaiah leh ramhnuaia venhim hna thawktute fakin, Task Force te, Police-te leh BSF leh Assam Rifles hote inrawnkhawma ramri ven dan zangkhai zawka kalpui dan tur duan a nih tur thu a sawi bawk a. Hei hi Chief Secretary kaihhruaina hnuaia kalpui tur a nih thu a sawi bawk.
Nimin a Council of Minister thukhawm hian mahni State ni lo a tangkhangte anmahni State a hruai haw nana sawrkar laipuiin Indian Railways phalna a pek angin, Mizoram mi leh sa State danga tangkhangte pawh an lo haw ve theih dan tur ngaihtuahsak an remti a. Ruahmanna duan a nih thuai tur thu Chief Minsiter chuan a sawi a. Manipur leh hmarchhak State danga tangkhang tunhnaia lo haw te sawrkar atanga a hrana puihna phut miah lova an lo haw hlawm chu fakawm a tih thu a sawi bawk.
Chief Minister, Zoramthanga chuan India ram leh Mizoram thenawm State bakah Mizoram depa awm ramdangte dinhmun enin ramri-ah khauh taka venhimna kalpui a la ngai tih chu sawrkar ngaihdan a nih thu a sawi a. Mizoram chhung erawh chu hripui chawlut lo zawng ni si a thlahdul dan sawrkarin a dap dawn niin a sawi bawk. Tuna khawvel pum tibuaitu hripui leng avang hian mihringte hi damkhawchhuah tuma theihtawpa bei vek an ni tih pawh sawiin, Mizo-ram tana malsawmna nih theihna turin ram leilung hmang tangkai a mipui zawng zawngin tan an lak a tul a ni, a ti bawk.

Comments

Chhiar Hlawhte