Minister pahnih hnenah Protective Visor hlan

Mizoram Science Centre hnuaia Innovation Hub in COVID-19 hripui leng mekah a hmatawnga thawktute hman tur Plastic hmai khuhna, Protective Visor an siam chu nimin khan Health Minister, Dr. R. Lalthangliana leh Home Minister, Lalchamliana te hnenah 12 ve ve an hlan a, Protective Visor Frame atan hian Polylactic Acid Filament(PLA), plastic dang ang lova tawih-ral thei an hmang a, a frame hi 3D Printer hmanga an duan chhuah niin a Visor atan Overhead Projector (OHP) sheet an hmang bawk a ni.

Health Minister, Dr. R. Lalthangliana chuan hetiang hmanrua Mizo pa ngei in a siamchhuak chu lawmawm a tih thu sawiin, Commerce & Industries Minister a nih ang pawhin he thil hi fakawm a tih thu a sawi a. Mizo thil siam leh dehchhuah te hi a theih chin chinah kan ngaihsan leh hman uar a tul thu sawiin, hripui hian engtia rei nge min tihbuai dawn a hriat loh a, chuvangin tualchhung thilsiam leh dehchhuah kawnga tan kan lak a pawimawh takzet a ni, a ti bawk.