COVID-19 do nan Mizoram Sawrkar hnuaia hlawh la zawng zawngte hlawh cut a ni dawn

Nimin May 5, 2020 khan Mizoram Sawrkar hnuaia sawrkar hnathawkte intelkhawmna Association hrang hrang 75 (sawmsarih leh panga) aiawhte inkokhawmin COVID-19 dona atan kumin December thla thlengin sawrkar hnathawkte hlawh chu cut nise an ti.
He inkohkhawmna ATI Auditorium, Aizawl-a neih hi Chief Secretary, Lalnunmawia Chuaungo chuan kaihruaiin COVID-19 do nana sawrkar hnathawkten contribution an pek belh dan tur an sawiho a, Chief Secretary chuan COVID-19 avanga Mizoram chauh ni lo, India ram leh khawvel in kawng tinreng a harsatna a tawh dan a sawi a. Mizoram kan la him rihin a lang naa India ramah chuan a ni telin a kai zat an pung a, a thi zat pawh an pung tual tual a, hei hian nasa takin khawvel pum economy a sawi nghing mek tawh a, eng ang chiaha nasain nge a tih thuanawp dawn tih hi hriat lawk theih a ni lo, a ti. Chief Secretary chuan Sawrkar Laipui sum hmuhna ber Chhiah lakkhawm a tlakhniam thu sawiin, Mizoram chawmtu ber Sawrkar Laipui atanga sum hmuh zat pawh a tlem sawt ta hle tih a sawi a, kan hma hun thlirin theihtawpa sawrkar hnathawkte an tan tlan a tul tak zet tih pawh sawiin, “Central atanga sum dawn zat a kiam zel laiin Budget duan laia sum senna tura chhut tel miahloh COVID-19 kaihhnawiha sum tam tak sen ral a lo ngai ta a, chuvangin COVID-19 dona tur leh tumah chhuanchham kan awm lohna turin mahni theihna zawn theuhah tan lak a ngai a ni,” a ti bawk.
He huna tel Association hrang hrang aiawh kalkhawmte hian Mizoram-in he hun harsa a tawh mek thlir chung leh an member-te dinhmun thlir chungin rawtna engemawzat an chhawp chhuak a. Chung zingah chuan lungrual takin kumin December thleng hian Mizoram Sawrkar hnuaia Group A, B leh C ten an hlawh (basic pay) atangin 10% leh Group D ten an hlawh (basic pay) atangin 5% thawh (contribute) an rem ti a ni.
He Meeting-ah hian Chief Secretary bakah Additional Chief Secretary to CM, JC. Ramthanga, Finance Commissioner Vanlalchhuanga, Planning Secretary Dr C.Vanlalramsanga leh Home Secretary Lalbiaksangi te pawh an tel a. Chief Secretary chuan meeting hi khaikhawmin Mizoram in hun harsa kan tawh mek laia Mizo tlawmngaihna rilru dik tak pu-a lungrual taka sawrkar hnathawkten an hlawh atanga sum tam tak pekchhuah an remti chu lawmawm a tih thu a sawi bawk.

Comments

Chhiar Hlawhte