Manipur atangin hruaihaw zo

Tunlai hripui leng mek COVID-19 avanga inkharkhipna kalpui a nih avanga Mizoram mi, Manipur-a tangkhang Mizoram a hruailuh hna chu ni 2 chhung kalpui a nih hnuah nizan hmasa khan zawhfel niin mi 292 hruai haw an ni a, an zinga mi 138 hi mipa niin, a dang 154-te chu hmeichhia an ni.
Mizoram sawrkar hmalakna kaltlanga tangkhangte hruaikir-ah hian a ni khatna, April 30, 2020 (Ningani)-ah mi 153 hruailuh an ni a, heng zingah hian mipa 73 leh hmeichhia 80 an awm a. A ni hnihna May 1, 2020 (Zirtawpni) khan mi 139 hruailuh leh an ni a, an zinga 65-te hi mipa niin, 74-te chu hmeichhia an ni thung. Ni hnih chhunga hruai haw zingah hian Aizawl District-a chengte tam berin mi 139 an awm a, Saitual District atangin mi 62, Kolasib District mi 40, Champhai District mi 17, Khaw-zawl District mi 10, Siaha District mi 10, Hnahthial District mi 8, Lunglei District mi 3 leh Lawngtlai District mi 3 an ni a, an zavai hian an mahni District theuha sawrkarin a ruat bik khunghranna hmun (Quarantine Centre)-ah dahluh nghal vek an ni. Hruai haw zinga upa ber hi kum 84 mi a nih laiin, a naupang ber chu kum 1 mi a ni ve thung.
Manipur atanga lo haw te hi Mizoram Sawrkarin anmahni hruailuhna tur atana a rua-hman (entry point), Tuivai/Khawkawn, Saitual District atang veka hruailuh an ni a. Mizoram an rawn luh hmain Tuivai kam, Manipur ram-chhung ni si-ah an chuanna Lirtheite chu hri thahna hmanga silfai (sanitise) sak vek an ni a, lokir te kut silna tur buatsaih a ni bawk. Mizoram leilung an rawn rah veleh hian Doctor-te'n an hriselna uluk takin an endiksak nghal a, Entry Point leh a chhehvelah hian Social Distancing dante pawh uluk taka zawm a ni.
Hetianga Manipur atanga rawn haw tur hruaikir hna thawh zawh a nih hnu hian ramri a inkalpawhna pawh khar zui nghal a ni.

Comments

Chhiar Hlawhte