Lockdown vangin PHE in Project thenkhat zo theilo

COVID-19 hri leng vangin PHE Serchhip WATSAN Division hnuaia project hna kal lai engemawzat chu a hun takah thawh zawh theih a ni dawn lo.
Hemi chungchanga PHE Serchhip WATSAN Division-a Sr. EE, Er. F. Lalsang-lura sawi danin, Biate Water Supply Scheme (Pumping) chu March 2020-a thawh zawh tur a nih laiin COVID-19 vanga rampuma lockdown puan a nih avangin hna chawlhsan a nih thu leh June 2020-ah chuan thawh zawh beisei a nih thu a sawi a, Chhingchhip-a Sainik School tui pekna tur (Water Supply to Sainik School) pawh June 2020-a thawh zawh tura ruahman a nih laiin hna chawlhsan a nih avangin a hunah thawh zawh theih a ni dawn lo tih a sawi bawk.
Jal Jeevan Mission (JJM) hnuaia thing-tlang khuaa chhungkua zawng zawng Tui connection pekna tur (Functional House Tap Connection (FHTC))-ah pawh kum 2019-2020 sawrkar kum chhungin khaw 18 pek tura ruahman a nih laiin khaw 5-ah chauh hna hi zawh hman a ni tih Er. F. Lalsanglura chuan a sawi a, lock-down vanga pipe siamtu lam an chawlh avangin hnathawhna tur pipe pawh a lo thleng thei lo tih a sawi a, Annual Action Plan 2020-2021 pawh approval lak theih ala nih loh thu sawiin, lock-down thlahdul a nih hnuah hmalakna tlem tlem kalpui theih a nih rualin an duh ang erawhin hmalakna an kal chakpui thei rih lo tih a sawi bawk.
Hetihlai hian Lockdown chhungin Ser-chhip khawpui leh an bial chhunga khaw danga mipuite hnena tui an sem chhuah ah erawh chu harsatna nei lovin tluang takin an kalpui thei zel rih tih Er. F. Lalsanglura chuan sawiin, East Lung-dar-ah leh Thingsulthliah-ah te lirthei hmanga tui sem hna (Emergency Water Supply by Truck) an thawk tih a sawi a, E.Lungdar-ah chuan lirthei hmanga Tui sem hna hi an titawp tawh thu leh Thingsulthliah-ah chuan an la kalpui chhunzawm zel  thu a sawi bawk.

Comments

Chhiar Hlawhte