COVID-19 laka Mizoram a him theih nan Serchhip Sub-Hqrs. YMA te ramri-ah an duty dawn

Serchhip Sub-Hqrs. YMA chuan Mizoram-a COVID-19 a rawn luh lohna tura ramri ven hna thawh mekah an huamchhunga ramri-a Duty te a tul anga pui turin penchhuah nise an ti a, a hmasa atan SEC Member te Duty turin kal nise an ti.
Serchhip Sub-Hqrs. YMA hian nimin khan an President, R. Sanghmingthanga kaihhruaina hnuaiah Executive Committee thutkhawm chu Serchhip Sub-Hqrs. YMA Committee Room, Serchhip-ah an nei a, tunlaia khawvel in a buaipui COVID-19 hrileng avanga Serchhip District chhunga Myanmar nena ramri Tiau lui kai-a duty mek Lungkawlh leh Sailulak khua te chhawk turin SEC Member mi 16 te Group 2-ah in thenin karkhat chhung duty nise an ti a, hemi hnu hian ramri-a duty te chhawk tur hian Sub-Hqrs. huamchhunga Branch hrang hrang te inchhawk a duty turin ruahmanna siam nise an ti bawk.
Hei bakah hian SEC Meeting hian COVID-19 hrileng avanga an huamchhunga hnamdang chambang te chu Branch tinin an area-a mi te uluk taka chhinchhiahin, lo awm thar te hriat hran theih nan ID Card siamsak vek nise an ti a, midang rawn awmbelh an awm chuan arang thei ang bera Sub-Hqrs. YMA hruaitu leh thuneitute hnenah hriattir turin an ti a. Sub-Hqrs YMA building luahtu mi 3 te chu tunhnaia an dawr an inhawn dan thlirin mi 2 te chu hri leng avangin April leh May thla In luahman ngaihnathiam (free) nise, midang pakhat chu April thla luah man ngaihnathiam (free) nise an ti bawk.
Nimin-a SEC Meeting hian Serchhip Sub-Hqrs. YMA Conference vawi 7-na kumin April 15-17 chhunga neih tura lo ruahman tawh, COVID-19 avanga neih theih a nih tak loh chungchang pawh ngaihtuahin, Central YMA lamin khawmpui leh Rorel Inkhawm neih theih hun tur a rel ngaihchan nise an ti a. COVID-19 hrileng mekah Vairengte leh Bairabi-a Essential Commodities phurtu endik dan chu duh aiin a khauh lo nia an hriat thu pawh sawiin, Sawrkar in uluk zawk leh khauh zawkin hma la se, Inter-State leh International Boundaries-ah khauh taka duty zel nise tiin Resolution siamin an pass bawk.
He huna tarlan a nih danin Serchhip Sub-Hqrs YMA hian COVID-19 avanga ramri a duty te tanpuinan Kolasib leh Mamit Sub-Hqrs. YMA leh Serchhip District chhunga Sailulak leh Lungkawlh Branch YMA te hnenah Rs. 2,40,681/- an lo pe tawh a Lungpho, Bungtlang Venglai, Vanchengte Branch leh Keitum Kawn Veng atangin ramri-a duty te tanpuina turin Rs. 81,000 a lut leh tawh bawk a ni.

Comments

Chhiar Hlawhte